प्रसिद्ध टेलिव्हिजन अभिनेता पर्ल व्ही. पुरी Pearl V Puri याला मुंबई पोलिसांनी अटक केली. अल्पवयीन मुलीच्या बलात्कारप्रकरणी पर्लसह इतर पाच जणांना वसईतून अटक करण्यात आली. "ही घटना जुनी आहे पण १७ वर्षीय मुलीने तिच्या आईसह पोलीस स्थानकांत येऊन तक्रार नोंदवली असून याप्रकरणी आम्ही गुन्हा दाखल केला आहे", अशी माहिती मिरा भाईंदर वसई विरार झोन २चे उपायुक्त संजय पाटील यांनी दिली. वसई कोर्टाने पर्लला पोलीस कोठडी सुनावल्याचंही त्यांनी सांगितलं. (Naagin actor Pearl V Puri arrested on rape charges)

याप्रकरणी 'नागिन ३' या मालिकेतील पर्लची सहकलाकार अनिता हसनंदानीने त्याची बाजू घेतली आहे. 'पर्लसंदर्भातील ही बातमी तथ्यहीन आहे, मी त्याला ओळखते. हे खरं नाही आणि हे खरं असू शकत नाही. सर्व खोटं आहे. सत्य लवकरच समोर येईल', अशी पोस्ट तिने लिहिली आहे.

पर्लने बऱ्याच मालिकांमध्ये भूमिका साकारल्या आहेत. 'नागिन ३', 'नागार्जुन एक योद्धा', 'बेपनाह प्यार' या मालिकांमध्ये त्याने काम केलंय. 'ब्रह्मराक्षस २' या मालिकेतही तो झळकला होता. २०१३ मध्ये त्याने 'दिल की नजर से खुबसूरत' या मालिकेतून छोट्या पडद्यावर पदार्पण केलं.