संपूर्ण भारतात गणेश चतुर्थी उत्सव मोठ्या जल्लोषात सुरु आहे. अनेक मोठ मोठे कलाकार आपल्या घरी या निमित्त धार्मिक कार्यक्रमाचे आयोजन करतांना दिसत आहे. त्यातच महाराष्ट्राचे मुख्यमंत्री एकनाथ शिंदे यांनी त्याच्या वर्षा या निवासस्थानी गणपती आरती आणि उत्सवाचे आयोजन केले आहे.

या सेलिब्रेशनमध्ये अनेक दिग्गज कलाकार पोहचले होते. शाहरुख खान, सलमान खान, आशा भोसले, जॅकी श्रॉफ यासारखे कलाकार बाप्पाच्या भक्तीत लीन झालेले दिसले.

यावेळी 'बिग बॉस OTT 2' चा विजेता एल्विश यादव देखील उपस्थीत होता. शिंदेच्या घरी त्याचे स्वागत करण्यात आले. त्याने गणरायाची आरतीही केली. याचे बरेच व्हिडिओ आणि फोटोदेखील सोशल मीडियावर व्हायरल होत आहे.

आता त्यातच राष्ट्रवादीचे नेते जितेंद्र आव्हाड यांनी याबाबत एक ट्विट शेयर केल आहे. आव्हाड हे नेहमीच त्यांच्या वेगळ्या धाटणीच्या स्वभावासाठी आणि परखड वक्तव्यांसाठी परिचित आहेत. त्यांनी एल्विशसाठी ही पोस्ट शेयर केली आहे. ज्यात एका फोटोत तो सीएम शिंदेच्या घरी बाप्पाची आरती करत आहे तर दुसऱ्या व्हिडिओ तो महिलांबद्दल वाईट बोलत आहे.

आव्हाड यांनी ट्विट करुन म्हटले आहे की, एल्विश यादव महाराष्ट्राच्या मुख्यमंत्र्यांच्या घरी पोहोचले. एल्विश यादव सारख्या कुप्रसिद्ध यूट्यूबर आणि सो कॉल्ड सोशल मीडिया इन्फ्ल्युएन्सरला या राज्याचे मुख्यमंत्री आपल्या शासकीय निवासस्थानी,गणेश आरतीसाठी बोलवत असतील,तर तो या पुरोगामी महाराष्ट्राचा अपमान आहे.

महिलांच्या बाबतीत अतिशय खालच्या स्तरावर जाऊन या माणसाने अनेक विधानं केली आहेत.याच्या मते,स्त्रियांना मेंदू कमी असतो. बाई ही फक्त चूल आणि मुलं सांभाळण्यासाठीच असते.तिने तेवढंच करावं.

हा प्रकार म्हणजे सरळ सरळ फुले दाम्पत्य,शाहू महाराज,आंबेडकरसाहेब यांच्यासारख्या महान विभूतींनी स्त्रियांच्या उद्धराचं जे कार्य केलं आहे त्याचा अपमान आहे.पुरोगामी महाराष्ट्राला न शोभणारी ही घटना आहे.

सध्या त्याचे हे ट्विट सोशल मीडियावर व्हायरल होत आहे. काही लोक एल्विशला ट्रोल करत आहे तर अनेकांनी तो कसा चांगला आहे याचे काही दाखले दिले आहेत.