राष्ट्रीय पुरस्कार विजेती अभिनेत्री नीना गुप्ता neena gupta यांचं काही दिवसांपूर्वीच 'सच कहूँ तो' हे आत्मचरित्र प्रकाशित झालं. या आत्मचरित्रामध्ये नीना यांनी त्यांच्या खासगी आयुष्य व कलाविश्वातील अनेक गोष्टींवर प्रकाश टाकला आहे. केवळ प्रकाशच नव्हे तर त्यांनी अनेक धक्कादायक खुलासेदेखील केले आहेत. त्यामुळे गेल्या काही काळापासून त्या सातत्याने सोशल मीडियावर चर्चेत येत आहेत. यामध्येच त्या त्यांच्या मुलीच्या म्हणजेच मसाबाच्या करिअरविषयीदेखील व्यक्त झाल्या आहेत. मसाबाने अभिनेत्री होऊ नये असं त्यांना कायम वाटत होतं. विशेष म्हणजे मसाबाचा लूक पाहून तिला कोणी काम देईल असं त्यांना वाटत नव्हतं. एका मुलाखतीत बोलत असताना त्यांनी मनातील ही गोष्ट जाहीररित्या व्यक्त केली होती. (neena-gupta-told-masaba-gupta-why-she-cant-become-actor-says-jis-tarah-tumhari-shakal-hai)

मसाबा ही नीना गुप्ता आणि विवियन रिचर्ड्स यांची मुलगी असून सध्या ती सेलिब्रिटी फॅशन डिझायनर म्हणून काम करत आहे. विशेष म्हणजे काही महिन्यांपूर्वीच' मसाबा मसाबा' या सीरिजच्या माध्यमातून तिने कलाविश्वात पदार्पण केलं. नीना गुप्ता यांना मसाबाने बॉलिवूडमध्ये काम करु नये असं वाटत असतानाच दुसरीकडे मात्र, मसाबाच्या पहिल्याच सीरिजचं प्रेक्षकांनी भरभरून कौतुक केलं.

"मी मसाबाला आधीच सांगितलं होतं जर तुला अभिनेत्री व्हायचं असेल तर तू विदेशात जा. ज्या पद्धतीची तुझी शरीररचना किंवा चेहरा आहे. किंवा, एकंदरीत तू ज्या पद्धतीने दिसतेस ते पाहता तुला या देशात काम करण्याची संधी फार कमी आहेत. त्यामुळे येथे तू कधीच अभिनेत्री होऊ शकत नाही. तू कधीच हेमा मालिनी किंवा आलिया भट्ट नाही होऊ शकत", असा सल्ला नीना गुप्ता यांनी मसाबाला दिला होता.

पुढे त्या म्हणतात, "लोक किती मतलबी असतात ना. एकदा मला, करण आणि शाहरुख खान फ्लाईटमध्ये भेटलो होतो. त्यावेळी त्यांनी मला त्यांचा फोन नंबर दिला. पण, ज्यावेळी मी त्यांना फोन केला तर त्यांनी उचललादेखील नाही."

दरम्यान, मसाबाचा जन्म झाल्यानंतर विवियन रिचर्ड्स यांनी नीना गुप्तांसोबत लग्न करण्यास नकार दिला. त्यानंतर नीना गुप्ता यांच्या आयुष्यात अनेक संकट आणि चढउतार आले. मात्र, या सगळ्या परिस्थितीला त्या धीराने सामोऱ्या गेल्या. या सगळ्याचं वर्णन त्यांनी त्यांच्या सच कहूँ तो या आत्मचरित्रात केलं आहे. नीना गुप्ता यांनी २००८ मध्ये दिल्लीतील चार्टर्ड अकाऊंट विवेक मेहरा यांच्यासोबत लग्न केलं आहे.