Nikita Rawal: बॉलीवूड अभिनेत्री निकिता रावलबद्दल एक धक्कादायक बातमी समोर आली आहे. निकिता रावलला तिच्या राहत्या घरी बंदुकीचा धाक दाखवत तिच्याच घरातील एका कर्मचाऱ्याने लुटले आहे.

पिस्तूल मानेवर ठेवत चोरट्यांनी निकिताचे दागिने आणि रोख साडेतीन लाख रुपयांचा ऐवज लंपास केला आहे. चोरट्यांपैकी एक निकिताच्या घरी काम करणारा नोकर असल्याचे सांगण्यात येत आहे. त्याने टोळीतील इतर काही सदस्यांसह योजना आखली होती. घरात कुणीही नसताना त्याने हा डाव साधला.

मात्र आश्चर्यांची गोष्ट म्हणजे निकितासोबत चोरीची घटना दुसऱ्यांदा घडली आहे. त्यामुळे निकिता खुपच घाबरली आहे. याआधीही दोन वर्षांपूर्वी बंदुकीच्या धाक दाखवून तिच्याकडून सुमारे सात लाख रुपये लुटण्यात आले होते.

आता निकिताने मुंबईच्या मालाड बांगूर नगर पोलीस ठाण्यात एफआयआर दाखल केला आहे. निकिता म्हणाली की तिने एफआयआर दाखल केला आहे आणि दोषींना अटक करण्यासाठी आणि तिचे पैसे आणि दागिने मिळवण्यासाठी पुढील तपास सुरू आहे.

"मला प्रचंड धक्का बसला आहे. माझ्या घरातीलच एका कर्मचाऱ्याने असं केलं आहे यावर माझा विश्वास बसत नाही.

लोक आधी विश्वास संपादन आणि नंतर त्याचा असा गैरवापर करतात हे खुपच त्रासदायक आहे. त्या चोरट्यांनी साडेतीन लाख रुपये आणि सर्व दागिने हिसकावले आहेत जे मी खूप मेहनतीने जमा केले होते."

निकिताच्या वर्कफ्रंटबद्दल बोलायचं झालं तर अनिल कपूरसोबत ब्लॅक अँड व्हाईट, जॉनसोबत गरम मसाला या चित्रपटांशिवाय अनेक बॉलिवूड आणि टॉलीवूड काम केले आहे.