Nushrratt Bharuccha back to India Israel Hamas : इस्त्राईलमध्ये एका कार्यक्रमाच्या निमित्तानं गेलेली बॉलीवूडची प्रसिद्ध अभिनेत्री नुसरत भरुचा ही अखेर भारतात परतल्याची माहिती सुत्रांनी दिली आहे. काही तासांपूर्वी नुसरत बाबत वेगवेगळ्या बातम्या समोर आल्या होत्या.

शनिवारी हमास या दहशतवादी संघटनेने इस्त्राईलवर हल्ला केला होता. त्यात मोठी जीवितहानी आणि वित्तहानी झाल्याचे दिसून आले होते. या घटनेनं साऱ्या जगाचे लक्ष वेधून घेतले होते. त्यावरुन वेगवेगळ्या चर्चांना सुरुवातही झाली होती. त्यात इस्त्राईलचे सरकार पूर्णपणे हादरुन गेल्याचे दिसून आले. अनेक देशांनी त्यांना आपला पाठींबाही दर्शवला होता.

यासगळ्यात बॉलीवूडची अभिनेत्री ही इस्त्राईलमध्ये अडकून पडल्याची माहिती समोर आली होती. त्यामुळे भारतातील तिच्या चाहत्यांना आणि कुटूंबियांना तिच्याविषयी मोठी काळजी वाटू लागली होती. काही तासांपूर्वी अभिनेत्रीच्या कुटूंबियांनी ती सुखरुप असून दुबईमार्गे मुंबईत येणार असल्याचे सांगितले होते.

एएनआयनं केलेल्या ट्विटनुसार काही वेळेपूर्वी नुसरत ही मुंबईच्या विमानतळावर आल्याचे सांगण्यात आले आहे.यामुळे तिच्या चाहत्यांना मोठा दिलासा मिळाला आहे. दुसरीकडे इस्रायलचे पंतप्रधान बिन्यामीन नेतान्याहू यांनी थेट युद्धाची घोषणा केली आहे. गाझा पट्टीतील ‘हमास’ या दहशतवादी गटानं जो हल्ला केला त्यात शंभराहून अधिक जण ठार झाले आहेत. यात इस्त्राईलनं देखील हमासला जशास तसे प्रत्युत्तर दिले आहे.

काही तासांपूर्वी मिळालेल्या माहितीनुसार, नुसरतच्या टीममधील संचिता त्रिवेदी यांनी म्हटले होते की, नुसरतशी संपर्क झाला असून ती काही वेळानंतर भारतात येणार आहे. त्यानंतर तिचे भारतात आगमन झाले आहे.