11 मार्चला सिनेमागृहात प्रदर्शित झालेली 'द काश्मिर फाईल्स'(The Kashmir Files) हा सिनेमा आपलं सत्य घटनेवर आधारित कथानक आणि व्यक्तिरेखांमुळे चांगलाच चर्चेत आहे. क्लासपासून मासपर्यंत अनेकांनी सिनेमाला पसंतीची पोचपावती दिली आहे. पण आता सिनेमातील महत्त्वाची व्यक्तिरेखा साकारणारी अभिनेत्री पल्लवी जोशी आपल्या व्यक्तिरेखेला घेऊन मोठं वक्त्व्य केलं आहे. ती म्हणाली,''भारतातील सगळ्या नागरिकांनी सिनेमातील माझ्या व्यक्तिरेखेचा तिरस्कार करायला हवा''. पल्लवी जोशी असं का म्हणाली असेल? काय रहस्य दडलंय या व्यक्तिरेखेत? 'द काश्मिर फाईल्स' सिनेमात पल्लवी जोशीनं जेएनयू प्रोफेसर राधिका मेननची भूमिका साकारली आहे. जी काश्मिरी विद्यार्थ्यांना स्वतंत्र काश्मिरच्या लढ्यासाठी प्रवृत्त करत आहे.

पल्लवीला ही व्यक्तिरेखा साकारण्यामागचं कारण विचारलं तेव्हा ती म्हणाली,''जेव्हा मी काश्मिर पंडितांशी त्यांच्यावर झालेल्या त्या अन्याया संदर्भात बोलत होते ,तेव्हा मी त्या खलनायकाला जास्त जवळून अनुभवलं. ते माझ्याकडं पाहून त्यांच्या मनातला तो द्वेष सांगत होते,जणू ते माझ्यात तो खलनायक पाहतायत असं काही क्षण मला वाटून गेलं. आणि मग मी ठरवलं मी या सिनेमातील ती प्रोफेसरची भूमिक करणार आणि जय्यत तयारीनीशी या व्यक्तिरेखेला लोकांसमोर ठेवण्यासाठी मी सज्ज झाले. मला ती इतकी उत्तम वठवायची होती की प्रत्येक भारतीयांना त्या व्यक्तीरेखेचा तिरस्कार करायलाच हवा''.

सिनेमा प्रदर्शनानंतर चर्चेचा एक सूर छेडला जात आहे की पल्लवी जोशीची 'द काश्मिर फाईल्स' सिनेमातील ही विचित्र भूमिका बुकर पुरस्कार विजेत्या लेखिका अरुंधती रॉय याच्यापासनं प्रेरित आहे. जी सिनेमात सांगतेय की,''काश्मिर कधीच भारताचा भाग नव्हता,हे एक ऐतिहासिक सत्य आहे. जर भारतानं स्वातंत्र्यासाठी इंग्रजांविरोधात युद्ध पुकारलं तर मग काश्मिर भारताविरोधात का नाही जाऊ शकत?''

पल्लवी जोशी यांची भूमिका विश्वविद्यलयाविरोधात भाष्य करणारी आहे अशी चर्चाही होतेय. पण त्यावर सिनेमाचे दिग्दर्शक विवेक अग्निहोत्री यांनी यावर स्पष्टिकरण देताना सांगितलं आहे की,यावर रीसर्च करा,गूगलवर माहिती मिळवा,सर्वांना आपलं उत्तर मिळून जाईल. पल्लवी जोशी व्यतिरिक्त द काश्मिर फाईल्स सिनेमात अनुपम खेर,मिथुन चक्रवर्ती,दर्शन कुमार यांनीही महत्त्वाच्या व्यक्तिरेखा साकारल्या आहेत. विवेक अग्निहोत्री दिग्दर्शित या सिनेमाची निर्मिती झी स्टुडिओ,तेज नारायण अग्रवाल,आई.एम.बुद्ध आणि अभिषेक अग्रवाल आर्ट्स बॅनर अंतर्गत करण्यात आली आहे.