Parag Kansara Death News कॉमेडियन राजू श्रीवास्तव यांच्या निधनानंतर फॅन्सला मोठा धक्का बसला आहे. या दुःखातून चाहते सावरत नाहीत तोच आणखी एका विनोदवीराच्या निधनाची बातमी समोर आली आहे. ‘द ग्रेट इंडियन लाफ्टर चॅलेंज’ शोच्या पहिल्या सीजीनमधून प्रेक्षकांचे भरभरून मनोरंजन केलेल्या विनोदवीर पराग कंसारा यांचे निधन झाले आहे. पराग यांचे मित्र आणि विनोदवीर सुनील पाल यांनी इंस्टाग्रामवर व्हिडिओ शेअर करत दुःखद बातमी दिली आहे. यावेळी सुनील पाल भावुक झाले होते.

व्हिडिओत सुनील पाल म्हणताहेत ' नमस्कार आणखी एक हृदय हेलावून टाकणारी बातमी समोर आली आहे आणि तीही कॉमेडी विश्वातून. 'लाफ्टर चॅलेंज' या शोमधील आमचे मित्र पराग कंसारा यांनी जगाचा निरोप घेतला आहे. 'उलटा सोच' असं म्हणत जे सगळ्यांना उलटा विचार करण्यास सांगून खळखळून हसवत होते तेच परत कंसारा आज आपल्यात नाही.

आमच्या कॉमेडी इंडस्ट्रीला कोणाची दृष्ट लागली कुणास ठाऊक. एक एक विनोदवीर आपल्याला सोडून जात आहेत.' पराग हे अत्यंत उत्कृष्ट आणि मुरलेले कलाकार होते असं सुनील पाल व्हिडिओत म्हणाले. पराग यांच्या आयुष्यात मोठा संघर्ष होता. अगदी शून्यापासून त्यांनी सुरुवात केली होती. त्यांनी जादूचे शो तसंच सर्कसमध्येही काम केलं होतं. त्यानंतर 'बॉम्बे टू गोवा' या सिनेमातही त्यांनी खास भूमिका साकारली होती.

पराग हे गुजरातचे राहणारे होते. 'लाफ्टर चॅलेंज' मधून प्रसिद्धी मिळाल्यानंतर त्यांनी हजारो स्टँडअप कॉमेडीचे लाईव्ह शो केले होते. ‘द ग्रेट इंडियन लाफ्टर चॅलेंज’ शोच्या पहिल्या सीजनमध्ये पराग कंसारा स्पर्धक म्हणून आले होते.

छोट्या पडद्यावर स्टँडअप कॉमेडीची संकल्पना घेऊन येणारा हा पहिला शो होता. या शोमुळे अनेक विनोदवीरांना मोठी प्रसिद्धी मिळाली होती. या पर्वात पराग विनर ठरले नसले तरी त्यांनी प्रेक्षकांचं भरभरून मनोरंजन केलं होतं. मात्र गेल्या काही वर्षापासून ते कॉमेडी इंडस्ट्रीपासून दूर झाले होते.