आंतराष्ट्रीय पातळीवर युद्धनीतीचे आदर्श मानले जाणारे महाराष्ट्राचं आराध्य दैवत छत्रपती शिवाजी महाराजांच्या सुवर्ण इतिहासातील आणखी एक सोनेरी अध्याय मोठ्या पडद्यावर पहायला मिळणार आहे. लेखक-अभिनेता-दिग्दर्शक दिग्पाल लांजेकरच्या संकल्पनेतून उदयास आलेल्या शिवराज अष्टकातील 'पावनखिंड' (Pawankhind) या तिसऱ्या चित्रपटात शिवरायांच्या रूपात रसिकांचा लाडका अभिनेता चिन्मय मांडलेकर (Chinmay Mandlekar) झळकणार आहे. 'फर्जंद' आणि 'फत्तेशिकस्त' या दोन चित्रपटांच्या अभूतपूर्व यशानंतर 'पावनखिंड'साठी चिन्मयनं पुन्हा एकदा आपल्या मस्तकी शिवरायांचा जिरेटोप चढवला आहे.

चित्रपटात मृणाल कुलकर्णी (Mrinal Kulkarni), प्राजक्ता माळी (Prajakta Mali) , अंकित मोहन (Ankit Mohan), क्षिती जोग (kshitee jog), अजय पूरकर (Ajay Purkar), समीर धर्माधिकारी (Sameer Dharmadhikari) आणि शिवराज वायचळ (Shivraj Waichal) या कलाकारांनी महत्वाच्या भूमिका साकारल्या आहेत.

दिग्पाल यांनी सोशल मीडियावर एक पोस्ट शेअर करून चित्रपटाचा ट्रेलर प्रदर्शित झाल्याची माहिती चाहत्यांना दिली. त्यांनी पोस्ट शेअर करून कॅप्शनमध्ये लिहिले, ''उपसून तलवार, कधी झेलून वार, त्या रात्री सहाशे वीर, झाले जीवावर उदार ,इतिहासातल्या अभूतपूर्व लढाईची झलक, सादर आहे 'पावनखिंड' चे ट्रेलर! हर हर महादेव.''