अनेक सेलिब्रिटी सोशल मीडियाचा आपल्या व्यावसायिक फायद्यासाठी पुरेपूर वापर करून घेतात. त्याबरोबरीनेच ते फॅन फॉलॉइंग टिकून रहावं,चाहत्यांमध्ये आपली इमेज चांगली रहावी किंवा आपल्याच नावाचा बोलबाला रहावा यासाठी वैयक्तिक आयुष्यातल्याही अनेक गोष्टी पोस्टच्या माध्यमातून शेअर करीत असतात. वेगवेगळे ग्लॅमरस फोटो किंवा व्हिडीओ शेअर करण्यात अग्रेसर असतात. पण यामुळे अनेकदा त्यांना ट्रोलिंगचाही सामना करावा लागतो. काही सेलिब्रिटी असं ट्रोलिंग मनावर घेतात तर काही 'जाने दो' म्हणत दुर्लक्ष करतात. 'ये जवानी,है दिवानी' या सिनेमात रणबीर कपूर जिच्यावर लट्टू झालेला दिसला ती अभिनेत्री एवलिन शर्मावरही आता तिच्या एका फोटोमुळे सोशल मीडियावर ट्रोलिंगला सामोरं जावं लागलंय. तो फोटो पुढे बातमीत आम्ही जोडला आहे. त्याविषयी सविस्तर वाचा. (Evelyn Sharma Post Breastfeeding Photo)

अभिनेत्री एवलिन शर्मानं(Evelyn Sharma) तुषार भिंडीशी लग्न केल्यानंतर बॉलीवूडपासनं दूर राहणं पसंत केलं. त्यातच तिनं गेल्यावर्षी नोव्हेंबर महिन्यात एका गोंडस मुलीला जन्म दिला. आज ती आपल्या मुलीसोबत घरी मातृत्वाचा आनंद घेत आहे. पण याच आनंदाच्या भरात जाणुनबुजून म्हणा किंवा चुकून म्हणा तिनं अशी गोष्ट केलीय की सोशल मीडियावर तिच्या त्या पोस्टवर जेवढ्या चांगल्या प्रतिक्रिया येत आहेत तितकंच तिला ट्रोलही केलं गेलंय. तिनं आपल्या तीन महिन्याच्या मुलीला ब्रेस्टफीडिंग करतानाचा फोटो सोशल मीडियावर पोस्ट केला अनं काही तासातच तो फोटो व्हायरल झाला. त्या फोटोत एवलिन खूप खुश दिसत आहे. ती तिचं मातृत्व मनापासुन एन्जॉय करतेय हे तिच्या चेहऱ्यावर स्पष्ट दिसतंय. या फोटोवर काही चाहते म्हणाले आहेत,''सगळ्यात आनंदाचा क्षण'' तर काही ट्रोलर्सनी म्हटलंय,''एवढी वैयक्तिक गोष्ट सोशल करायची काहीच गरज नव्हती''. सुरुवातीला हा फोटो चुकून पोस्ट झाल्यासारखं वाटलं पण एवलिन शर्माचं फोटो कॅप्शन वाचून खात्री पटली की तिनंच तो स्वतःहून पोस्ट केला आहे. असो,पण एखादी अभिनेत्री जेव्हा आपल्या फीगरचा विचार न करता पूर्णपणे मातृत्वाचा आनंद घेताना दिसते तेव्हा त्यातूनही अनेकांना धडा मिळतो हे तितकच खरं आहे. त्यामुळे एवलिननं हा पोस्ट करून एकप्रकारे समाजप्रबोधनच केलं आहे.