Prarthana Behere: काल (19) छत्रपती शिवाजी महाराजांची जयंती पार पडली. संपूर्ण देशभरात छत्रपती शिवाजी महाराजांच्या जयंतीचा उत्साह बघायला मिळाला. काल राज्यभरात विविध कार्यक्रमांचे आयोजन करण्यात आले आहे. लातूरमधील (Latur) एका कार्यक्रमात अभिनेत्री प्रार्थना बेहेरेने (Prarthana Behere) हजेरी लावली होती. या कार्यक्रमात प्रार्थनानं छत्रपती शिवाजी महाराजांच्या (Chhatrapati Shivaji Maharaj) नावाचा एकेरी उल्लेख केला. त्यामुळे शिवभक्त तिच्यावर चिडले. अशताच आता प्रार्थनानं आता या प्रकरणी माफी मागितली आहे.

तरुणांनी बॅनर्स फाडून निषेध व्यक्त केला

लातूरच्या उदगीर येथील एका मॉलच्या उद्धाटन सोहळ्याला अभिनेत्री प्रार्थना बेहेरेनं हजेरी लावली. यावेळी छत्रपती शिवाजी महाराज जयंतीच्या सर्वांना शुभेच्छा देताना तिनं छत्रपती शिवाजी महाराजांच्या नावाचा एकेरी उल्लेख केला. त्यानंतर शहरातील तरुणांनी प्रार्थनाचा निषेध करुन तिच्या स्वागतासाठी लावण्यात आलेले बॅनर्स फाडले.

प्रार्थनानं मागितली माफी

प्रार्थनाचा एक व्हिडीओ सध्या सोशल मीडियावर व्हायरल होत आहे. ज्यामध्ये ती माफी मागताना दिसत आहे. ती म्हणते,"नमस्कार मी प्रार्थना बेहेरे, छत्रपती शिवाजी महाराज जयंतीच्या तुम्हासर्वांना शुभेच्छा, आज मी उदगीरमध्ये आले होते. मॉलच्या ओपनिंगसाठी तिथे मी चुकून काही बोलले असेल तर मी सर्वांची माफी मागते."

प्रार्थनाचे चित्रपट आणि मालिका

जय महाराष्ट्र ढाबा बठिंडा,मितवा,कॉफी आणि बरंच काही या चित्रपटांमधून प्रार्थना प्रेक्षकांच्या भेटीला आली. तसेच पवित्र रिश्ता, माझी तुझी रेशीमगाठ या मालिकांमध्ये देखील प्रार्थनानं काम केलं आहे. प्रार्थनाच्या आगामी मालिका आणि चित्रपटांची प्रेक्षक उत्सुकतेने वाट बघत आहेत.