‘बिग बॉस मराठी’चा १०० दिवसांचा खेळ आता अंतिम टप्प्यात आला आहे. बिग बॉस च्या खेळाचा विजेता ठरण्यासाठी अवघे ७ दिवस बाकी आहेत. अशा या महत्वाच्या टप्प्यावर बिग बॉसच्या घरातील शेवटचे एलिमिनेशन पार पडले, यावेळी ९३ दिवसांचा टप्पा पार परत अभिनेता प्रसाद जवादे बिग बॉसच्या घराबाहेर पडला.

(prasad jawade eliminated Bigg Boss Marathi 4)

गेल्या आठवड्यात अपूर्वा नेमळेकर, राखी सावंत, अमृता धोंगडे, किरण माने, प्रसाद जवादे, अक्षय केळकर, आरोह वेलणकर हे सदस्य घरामध्ये होते. यामध्ये अपूर्वा तिकीट टू फिनाले टास्क जिंकून शेवटच्या आठवड्यात गेली तर राखी, प्रसाद आणि अमृता नॉमिनेट झाले. त्यातून काल प्रसाद जवादेची बिग बॉसमधून एग्झिट झाली.

गेली काही दिवस सर्वच सदस्य प्रसादला नॉमिनेट करत होते. त्याच्या वागण्यावर, खेळावर सगळेच स्पर्धक नाराज होते. किंबहुना ,मला या घराबाहेर जायचं आहे, असं प्रसाद अनेकदा म्हणाला होता. पण शेवटच्या काही दिवसात त्याचा खेळ बराच सुधारला. त्या आठवड्यात तर मांजरेकरांनी त्याच्या खेळाचे कौतुक केले. पण दुर्दैवाने तो एलिमिनेट झाला आणि त्याला घराबाहेर जावे लागले.

घराबाहेर पडताना प्रसादचे डोळे पाणावले. तर “आपली जी भांडणं आहेत ती आपण याच घरापुरती ठेवूया,” असं म्हणत प्रसादने सर्वांची माफी मागितली. यावेळी सगळ्या स्पर्धकांनी भावूक होत प्रसादला निरोप दिला. आता अवघ्या काही दिवसात या पर्वाचा ग्रँड फिनाले होणार आहे. त्यामुळे ही पर्व कोण जिंकणार याची सर्वांना उत्सुकता आहे.