सहा दशकांहून अधिक काळ रंगभूमी आणि चित्रपटांमध्ये भूमिका साकारणारे ज्येष्ठ अभिनेते आणि नटश्रेष्ठ श्रीकांत मोघे यांचे शनिवारी राहत्या घरी निधन झाले. ते ९१ वर्षांचे होते. मराठी चित्रपटसृष्टीतील चॉकलेट हीरो अशी त्यांची प्रतिमा होती. त्यांच्यामागे पत्नी, पुत्र प्रसिद्ध अभिनेते शंतनू मोघे आणि सून प्रिया मराठे असा परिवार आहे. श्रीकांत मोघेंच्या आठवणीत अभिनेत्री प्रिया मराठेने सोशल मीडियावर भावूक पोस्ट लिहिली आहे. सासरे फक्त म्हणायला, होता तो मला बाबापेक्षाही जवळचा, अशा शब्दांत तिने भावना व्यक्त केल्या. 

प्रिया मराठेची पोस्ट- 
'माझा बाबा!
इतकं प्रेम , माझा नवरा सोडल्यास क्वचितच कोणी माझ्यावर केलं असेल. सासरे फक्त म्हणायला, होता तो मला बाबापेक्षाही जवळचा. माझं पीयूडं, माझं लाडकं अशी हाक मारत दोन्ही हात पसरून, मला मिठीत घ्यायचा. प्रयोग संपवून आले असले की आज किती बुकिंग होतं प्रयोग कसा झाला पुढचा कुठे आहे असे सगळे प्रश्न विचारायचा. बाबा आणि मुलाचं हे असं नातं ही मी पहिल्यांदाच पाहिलं. शंतनु बाबाचे गालगुच्चे घ्यायचा, त्याला प्रेमानी अक्षरशः चुर्गळून टाकायचा आणि ते बाबाला अत्यंत सुख देऊन जायचं. गेली काही वर्षं तो व्हीलचेअरवर होता पण तरी त्याच्या चेहेऱ्यावर मी कधीच, एका क्षणासाठीसुद्धा उदासीनता पाहिली नाही. उलट आम्हाला लाजवेल इतका उत्साहच कायम पहिला. मित्रा एका जागी नाही असे फार थांबायचे, हे धोरण मानून कशातच तो फार अडकला नाही. हा वाहणारा प्रेमाचा धबधबा थांबला पण माझ्या कुटुंबाच्या मनात त्याचं प्रेम आणि रसिक प्रेक्षकांच्या डोळ्यात त्याचा ज्वलंत अभिनय कायमच जिवंत राहील.'

श्रीकांत मोघे यांचा चित्रपटसृष्टी आणि नाटकातील प्रवास प्रदीर्घ होता. 'लेकुरे उदंड जाली' हे त्यांचं नाटक प्रचंड गाजलं. या नाटकाने श्रीकांत मोघे रंगभूमीवर अजरामर झाले. गुडघेदुखीचा त्रास होत असल्याने गेली काही वर्षे घरातल्या घरात व्हीलचेअरवर बसून ते नाटकातील स्वगतं आणि कवी सुधीर मोघे यांच्या कवितांचं सादरीकरण करत असत.