बॉलिवूडची 'देसी गर्ल' अर्थात प्रियांका चोप्रा सध्या तिच्या 'अनिफिनिश्ड' या पुस्तकामुळे चर्चेत आहे. या पुस्तकात प्रियांकाने तिच्या व्यावसायिक व वैयक्तिक आयुष्याविषयी बरेच खुलासे केले आहेत. यामध्ये तिने एका दिग्दर्शकाचा उल्लेख केला, ज्यांनी तिला प्लास्टिक सर्जरी करण्याचा सल्ला दिला होता. 

पुस्तकात त्या घटनेचा उल्लेख करत प्रियांकाने लिहिलं, 'मी कामानिमित्त एका दिग्दर्शकाला भेटायला गेले होते. बोलता बोलता त्यांनी मला अचानक उभं राहायला सांगितलं. बराच वेळ ते माझं निरीक्षण करत होते. तुला जबडा, ब्रेस्ट आणि बट सर्जरी करण्याची गरज आहे, असा अजब सल्ला त्यांनी मला दिला. जर मला अभिनेत्री व्हायचं असेल तर प्लास्टिक सर्जरी करावी लागेल असं ते म्हणाले. लॉस एंजिलिसमध्ये मी एका डॉक्टरला ओळखतो, तिथे जाऊन तू सर्जरी कर असं त्यांच्या तोंडून ऐकल्यानंतर मी माझा आत्मविश्वासच गमावला. तेव्हापासून मी स्वत:ला खूप कमी लेखू लागले होते.'

हेही वाचा : हर्षदा खानविलकरच्या घरी आस्ताद-स्वप्नालीचं केळवण; पाहा फोटो

प्रियांकाने इतक्या वर्षांनंतर आता या घटनेचा खुलासा का केला असा प्रश्न तिला एका मुलाखतीदरम्यान विचारण्यात आला. "मी कोणाला कोणत्याच गोष्टींचं स्पष्टीकरण देण्यासाठी त्या घटनेचा खुलासा केला नाही. बॉलिवूड इंडस्ट्री ही पुरुषप्रधान आहे आणि माझी स्वत:ची वेगळी ओळख निर्माण करण्यासाठी मला बरीच मेहनत घ्यावी लागली. करिअरच्या सुरुवातीलाच जर मी अशा घटनांचा खुलासा केला असता तर लोकांनी माझा पाय खेचायचा पुरेपर प्रयत्न केला असता. मी त्या गोष्टींबद्दल कोणालाच काही बोलले नाही. मी माझं काम केलं आणि त्यातून पुढे आले. आता मी आयुष्याच्या अशा टप्प्यावर आहे जिथे मला त्या गोष्टींचा काही फरक पडत नाही. म्हणून त्या घटनांचा पुस्तकात उल्लेख केला", असं ती 'एशियन स्टाइल मॅगझिन'ला दिलेल्या मुलाखतीत म्हणाली.