'निक जोनासची पत्नी' असा उल्लेख करणाऱ्या एका न्यूज आऊटलेटला अभिनेत्री प्रियांका चोप्राने (Priyanka Chopra) सुनावलं. इन्स्टाग्राम स्टोरीमध्ये त्याचा स्क्रीनशॉट पोस्ट करत प्रियांकाने राग व्यक्त केला. 'मी सर्वांत मोठ्या चित्रपटाच्या फ्रँचाइसचं प्रमोशन करतेय आणि तरी माझा उल्लेख निक जोनासची पत्नी असा केला जातोय', असं तिने त्यात म्हटलंय. गेल्या आठवडाभरापासून प्रियांका तिच्या 'द मॅट्रिक्स रिसरेक्शन्स' (The Matrix Resurrections) या चित्रपटाचं जोरदार प्रमोशन करतेय. याच प्रमोशनचा एक भाग म्हणून चित्रपटाविषयीचा लेख एका वृत्तात छापला गेला होता. मात्र त्यात प्रियांकाचा अभिनेत्री म्हणून उल्लेख न करता निक जोनासची पत्नी म्हणून उल्लेख केल्याने तिला संताप व्यक्त केला आहे.

लेखाचा स्क्रीनशॉट इन्स्टा स्टोरीमध्ये पोस्ट करत प्रियांकाने लिहिलं, 'हे खूपच मनोरंजक आहे की मी आतापर्यंतच्या सर्वात प्रतिष्ठित चित्रपट फ्रँचाइजीपैकी एकाचं प्रमोशन करतेय आणि मला अजूनही '...ची पत्नी' म्हणून संबोधलं जातंय. कृपया मला याचं स्पष्टीकरण द्या की हे एखाद्या महिलेसोबत कसं घडू शकतं? तुम्हाला समजण्यासाठी मी माझी IMDbची लिंक इथे पोस्ट करू का?' या पोस्टमध्ये प्रियांकाने तिच्या पतीलाही टॅग केलं आहे.

प्रियांका या संपूर्ण आठवड्यात चित्रपटाचं प्रमोशन करतेय आणि अनेक प्लॅटफॉर्म्सवर निकसुद्धा याबद्दल बोलला आहे. अलीकडेच जेडा पिंकेट स्मिथच्या 'रेड टेबल टॉक' या शोच्या १००व्या भागात, प्रियांकाने खुलासा केला की निक या चित्रपट फ्रँचाइजीचा खूप मोठा चाहता आहे. इतकंच नव्हे तर प्रियांका या चित्रपटाचा एक भाग असल्यामुळे त्याने त्याच्या चाहत्यांसमोरही खूप कौतुक केल्याचं तिने सांगितलं.

'द मॅट्रिक्स रिसरेक्शन्स' हा चित्रपट एचबीओ मॅक्स आणि थिएटर्समध्ये येत्या २२ डिसेंबर रोजी प्रदर्शित होणार आहे. यामध्ये प्रियांकासोबत केनू रीव्हस, कॅरी-अ‍ॅनी मॉस, जेडा, नील पॅट्रिक हॅरिस, याह्या अब्दुल-मतीन II, जोनाथन ग्रोफ यांच्या भूमिका आहेत.