सक्तवसूली संचलनालयाने म्हणजे ईडीने चार वर्षे जुन्या असलेल्या एका ड्रग्ज प्रकरणामध्ये टॉलीवूडच्या टॉप एक्टर्स आणि डायरेक्टर्सना समन्स जारी केला आहे. यामध्ये रकुल प्रीत सिंह, राणा दग्गुबाती, रवि तेजा आणि पुरी जगन्नाथ यांचा समावेश आहे. हे सगळे साऊथ सिनेमाचे लोकप्रिय चेहरे आहेत. या सगळ्यांना एकावेळीच समन्स पाठवण्यात आले आहेत. रकुल प्रीत सिंहला ६ सप्टेंबर, राणा दग्गुबातीला ८ सप्टेंबर, रवि तेजाला ९ सप्टेंबर आणि पुरी जगन्नाथला ३१ सप्टेंबरला ईडीने बोलावलं आहे. या चार वर्षे जुन्या असलेल्या ड्रग्ज प्रकरणात आतापर्यंत 12 लोकांना समन्स पाठवण्यात आले आहेत.

हे प्रकरण तेलंगाणाच्या उत्पादन शुल्क विभागाशी संबंधित आहे. या विभागाद्वारे जुलै २०१७ साली एका फेमस बारमध्ये तपासानंतर दाखल करण्यात आलेल्या १२ खटल्यांवर आधारित आहे. या प्रकरणी ११ चार्जशीट दाखल करण्यात आल्या होत्या. रकुल प्रीत सिंह, राणा दग्गुबती, रवी तेजा किंवा पुरी जगन्नाथ यांची नावे आरोपी म्हणून नाहीयेत. मात्र, ते मनी लाँडरिंग प्रकरणामध्ये सामील आहेत की नाही हे आताच सांगणं थोडं घाईचं ठरेल, असं एजन्सीच्या एका वरिष्ठ अधिकाऱ्यानं म्हटलंय.

2017 मध्ये तेलंगणा उत्पादन शुल्क विभागाने 30 लाख किमतीचे ड्रग्ज जप्त केल्यानंतर 12 गुन्हे दाखल केले होते. 11 प्रकरणांमध्ये आरोपपत्र दाखल करण्यात आले आहेत.

या प्रकरणी, आतापर्यंत 30 जणांना अटक करण्यात आली आहे आणि 62 जणांची तेलंगणा उत्पादन शुल्क विभागाने ड्रग्ज प्रकरणी चौकशी केली आहे. यातील ज्यांची चौकशी करण्यात आली आहे, त्यातील अकरा जण फिल्म इंडस्ट्रीशी संबंधित आहेत.