राज्यातील कोरोनाबाधितांचा आकडा झपाट्याने वाढत असताना आता आणखी एक धक्कादायक माहिती समोर येत आहे. अभिनेता अक्षय कुमारच्या आगामी 'रामसेतू' या चित्रपटाच्या सेटवरील ४५ ज्युनिअर आर्टिस्टना कोरोनाची लागण झाली आहे. अक्षयचाही कोरोना रिपोर्ट पॉझिटिव्ह आला असून रविवारी सोशल मीडियावर पोस्ट लिहित त्याने याबाबतची माहिती दिली होती. मुंबईतील मड आयलँड याठिकाणी आज (१५ एप्रिल) १०० लोकांची एक टीम 'रामसेतू'च्या सेटवर पोहोचणार होती. त्यापूर्वी अक्षय आणि इतर आर्टिस्टची कोरोना चाचणी करण्यात यावी असा निर्णय निर्माते विक्रम मल्होत्रा यांनी घेतला होता. त्यानंतर या १०० लोकांपैकी ४५ लोकांचा रिपोर्ट पॉझिटिव्ह आला आहे. 

"रामसेतू चित्रपटाची टीम सर्व प्रकारची काळजी घेत आहे. ज्या ४५ जणांना कोरोनाची लागण झाली आहे, त्या सर्वांना क्वारंटाइन करण्यात आलं आहे", अशी माहिती 'फेडरेशन ऑफ वेस्टर्न इंडिया सिने इम्पॉइज'चे (FWICE) सचिव अशोक दुबे यांनी दिली. या चित्रपटाची शूटिंग सध्या थांबवण्यात आली आहे. जवळपास १३-१४ दिवसांनंतर या चित्रपटाच्या शूटिंगला सुरुवात होईल. 

हेही वाचा : 'लक्ष्मी'चा टीव्हीवर नवा विक्रम; पाच वर्षांतला सर्वांधिक व्ह्यूज मिळालेला चित्रपट

अक्षय कुमारला कोरोना
अक्षयने रविवारी सोशल मीडियावर पोस्ट लिहित त्याला कोरोना झाल्याची माहिती चाहत्यांना दिली. 'माझा कोरोना चाचणीचा रिपोर्ट पॉझिटिव्ह आला आहे. त्यानंतर मी लगेचच स्वत:ला क्वारंटाइन करून घेतलं. सध्या मी घरीच क्वारंटाइनमध्ये राहत असून डॉक्टरांच्या सल्ल्यानुसार सर्व नियम पाळत आहे. माझ्या संपर्कात आलेल्यांनी कृपया चाचणी करून घ्यावी', अशी पोस्ट त्याने लिहिली होती. 

राज्यात अंशत: लॉकडाउन
जीवनावश्यक वस्तू वगळता सर्व प्रकारची दुकाने, बाजारपेठा, उपहारगृहे, खासगी कार्यालये, मॉल्स ३० एप्रिलपर्यंत पूर्ण बंद ठेवण्याचा निर्णय राज्य सरकारने घेतला. शनिवार आणि रविवारी संचारबंदी, रात्री ८ ते सकाळी ७ पर्यंत संचारबंदी, दिवसा जमावबंदी, असे विविध निर्बंध लागू करीत राज्य सरकारने राज्यात अंशत: लॉकडाउनच लागू केली. मात्र रेल्वे आणि रस्ते वाहतुकीवर कोणतेही निर्बंध नसून, वृत्तपत्र वितरणासही मुभा देण्यात आली आहे.