प्रसिद्ध कोरिओग्राफ आणि दिग्दर्शक रेमो डिसूझाचा (Remo D'Souza) मेहुणा जेसन वॅटकिन्स (Jason Watkins) त्याच्या मिल्लत नगर इथल्या राहत्या घरी मृतावस्थेत आढळला. जेसनची बहीण आणि रेमोची पत्नी लिझेल डिसूझाने (Lizelle D'Souza) इन्स्टाग्राम स्टोरीवर फोटो पोस्ट करत शोक व्यक्त केला. भावासोबतचा बालपणीचा फोटो तिने पोस्ट केला आहे. 'का, तू असं कसं करू शकतोस? मी तुला कधीच माफ करणार नाही', असं लिझेलने या फोटोवर लिहिलं आहे.

'ई टाइम्स'ने दिलेल्या वृत्तानुसार जेसनच्या मृतदेहाला कूपर रुग्णालयात आणलं असून ओशिवरा पोलीस आवश्यक कायदेशीर प्रक्रिया पूर्ण करत आहेत. रेमो आणि लिझेल सध्या गोव्यात आहे. एका लग्नसमारंभासाठी ते गोव्याला गेले होते. जेसन वॅटकिन्स गेल्या काही वर्षांपासून चित्रपटसृष्टीत काम करत होता. रेमो डिसूझाच्या सर्व प्रोजेक्ट्समध्ये त्याने सहाय्यक दिग्दर्शक म्हणून काम केलं.

रेमोची पत्नी लिझेल ही कॉश्च्युम डिझायनर असून तिने अनेक टेलिव्हिजन शोजसाठी कॉश्च्युम डिझाइन केले आहेत. रेमो आणि लिझेल यांना ध्रुव आणि गॅब्रिएल ही दोन मुलं आहेत.