नागराज मंजुळे(Nagraj Manjule)च्या 'झुंड'(Jhund) सिनेमाला समिक्षकांपासून सेलिब्रिटींपर्यंत अनेकांनी पसंतीची पोचपावती दिली आहे. परफेक्शनीस्ट आमिर खान तर सिनेमा पाहिल्यानंतर इतका भारावून गेला की त्यानं थेट जाहिर केलं की नागराजच्या 'झुंड' सिनेमानं माझ्या ३०-३५ वर्षाच्या कारकिर्दीला फुटबॉलसारखं भिरकावून दिलं आहे. मराठी सिनेइंडस्ट्रीतीलही अनेक कलाकारांनी नागराजच्या 'झुंड' सिनेमाचं कौतूक करताना प्रेक्षकांना सिनेमागृहात जाऊन सिनेमा पाहण्याचं आवाहन केलं आहे. कारण समिक्षकांनी सिनेमा गौरविला असला तरी बॉक्सऑफिस कलेक्शनवर मात्र सिनेमा हवी तशी अपेक्षेप्रमाणे कमाई करु शकलेला नाही.

अभिनेता रितेश देशमुखने नागराज मंजुळेचा 'झुंड' सिनेमा पाहिल्यानंतर केलेली पोस्ट आता चर्चेत आहे. त्यानं नागराजच्या सिनेमाचं कौतूक करताना प्रेक्षकांना सिनेमागृहात जाऊन सिनेमा पाहण्याचं आवाहन केलं आहे. त्यानं त्याच्या पोस्टमध्ये लिहिलं आहे, ''नागराजचा झुंड सिनेमा स्वतःसाठी मोठ्या पडद्यावर जाऊन पहा. त्यानं त्याच्या सिनेमाच्या माध्यमातून कधी आपल्याला रडवलं, कधी हसवलं,कधी आनंदाचे क्षण जगायला दिले तर कधी असह्य वेदनेची जाणीव करुन दिली. बुरसटलेल्या समाजव्यवस्थेच्या भिंतींनी विभागलेल्या दोन भारताची रुपं त्यानं आपल्या सिनेमातनं नेहमी आपल्याला दाखवली आहेत''. रितेश देशमुख आणि नागराज मंजुळे एकत्रितपणे छत्रपती शिवाजी महाराज यांच्या सिनेमावर काम करीत आहेत.

नागराज मंजुळे दिग्दर्शित 'झुंड' हा सिनेमा समाजातील व्यवस्थेवर भाष्य करतो. अमिताभ बच्चन यांनी या सिनेमात फुटबॉल प्रशिक्षकाची भूमिका केली आहे. विजय बारसे असं त्यांच्या व्यक्तिरेखेचे नाव आहे. आणि प्रत्यक्ष विजय बारसे नामक फुटबॉल प्रशिक्षक यांनी झोपडपट्टीतील मुलांना एकत्रित संघटीत करुन झोपडपट्टी फुटबॉल संघ भारतभर स्थापन करण्याचं महान कार्य केलं आहे. समाजातील दुर्लक्षित घटकाला प्रवाहात आणण्याचा त्यांचा संघर्ष नागराजनं 'झुंड' या सिनेमाच्या माध्यमातून पडद्यावर मांडला आहे.