मनोरंजन विश्वातून एक धक्कादायक बातमी समोर येतेय. सलमान खानच्या प्रॉडक्शन हाऊसमध्ये काम करणारा मेकअप आर्टिस्ट पालेश्वर चव्हाणवर मुंबईतील एका बारबाहेर हल्ला करण्यात आला.

पालेश्वरने एकदा एका मॅनेजरला काही पैसे दिले होते, मात्र त्याने पैसे परत मागितले असता मॅनेजरने त्याला मारहाण केली. त्याची प्रकृती चिंताजनक झाल्यावर स्थानिक पोलिसांच्या मदतीने पालेश्वरला रुग्णालयात नेण्यात आले, त्यानंतर आरोपीविरुद्ध तक्रार दाखल करण्यात आली.

(salman khan makeup artist paleshwar chavan beaten up in Mumbai)

मेकअप आर्टिस्ट पालेश्वरने बार मॅनेजर सतीशला काही पैसे उधार दिले होते. पहिल्यांदा दिलेले पैसे पालेश्वरला परत मिळाले. त्यानंतर विश्वास ठेऊन पालेश्वरने पुन्हा त्याला तीन लाख रुपये दिले.

जेव्हा पालेश्वर तीन लाख मागायला गेला तेव्हा सतीशने कारणं सांगितली. पुढे पैसे मागण्यासाठी पालेश्वर सांताक्रूझमधील पुष्पक बारमध्ये रात्री १० वाजता पोहोचला. सतीशने आधी त्याला दोन-तीन तास वाट पहायला लावली. त्यानंतर बार बंद आहे नंतर ये, असं त्याला सांगितले.

पालेश्वर तिथून गेला नाही. त्यानंतर रात्री एक वाजण्याच्या सुमारास सतीश आणि पालेश्वर यांच्यात जोरदार वाद झाला. प्रकरण इतके वाढले की मॅनेजरने वेटरला आणि त्याच्या मित्रांना बोलावले. त्या मित्रांनी लोखंडी रॉड, विटा आणि दगड घेऊन पालेश्वरवर हल्ला केला. यामुळे तो गंभीर जखमी झाला. त्यानंतर स्थानिक पोलिसांच्या मदतीने त्याला रुग्णालयात दाखल करण्यात आले.

पालेश्वरची प्रकृती चिंताजनक झाल्याने स्थानिक पोलिसांच्या मदतीने त्याला खासगी रुग्णालयात नेण्यात आले. पालेश्वरने बार व्यवस्थापकासह सर्व आरोपींविरोधात तक्रार दाखल केली आहे. बार मॅनेजर सतीश हा त्याचा मित्र असल्याचे पालेश्वरने पोलिसांना सांगितले आहे.