Salman Khan hotel : अभिनेता सलमान खान आता 'साठी' गाठत आला तरी त्याची हवा काही कमी झालेली नाही. अजूनही चाहते त्याची एक झलक पाहण्यासाठी वेडेपिसे होतात. त्यांच्या चाहत्यांनी त्याला दिलेली 'भाईजान' ही ओळखच त्यांचं प्रेम सांगून जाते.

काही दिवसांपूर्वीच त्याचा 'किसीका भाई किसी की जान..' हा चित्रपट येऊन गेला. आता भाईजानने त्याच्या चाहत्यांना एक आनंदाची बातमी दिली. भाईजान आता एका मोठ्या व्यवसायात पदार्पण करत आहे.

कलाकार म्हंटलं की त्यांचे संबंध कोणत्या ना कोणत्या व्यवसायासही जोडलेले असतातच. सलमाननही एका मोठ्या व्यवसायात उडी घेतली आहे. तो स्वतःचे हॉटेल सुरू करणार आहे.

(Salman Khan to build 19 floor hotel in bandra sea facing property)

सलमान आता मुंबईतील वांद्रे येथील कार्टर रोडवर 19 मजली हॉटेल बांधणार आहे. ही बातमी समजताच भाईजानच्या चाहत्यांमध्ये आनंदाचे वातावरण आहे. कार्टर रोडवरील सी-फेसिंग प्लॉटवर ही हॉटेल बांधण्यात येणार आहे. 'बीएमसी'ने त्याच्या या हॉटेलच्या आराखड्याला मंजुरी दिल्याचंही अहवालात नमूद करण्यात आले आहे.

साधारण 19 मजली हे हॉटेल असणार आहे. त्याची उंची अंदाजे 69.9 मीटर असेल. बीएमसीकडे सादर केलेल्या प्रस्तावानुसार तीन स्तरांचे तळघर, पहिला आणि दुसरा मजला कॅफे आणि रेस्टॉरंटसाठी, तिसरऱ्या मजल्यावर जिम आणि जलतरण तलाव तर चौथा मजला सर्व्हिस फ्लोअरसाठी असेल.

यामध्ये पाचवा आणि सहावा मजला कन्व्हेन्शन सेंटरसाठी असेल. तसेच सात ते 19 मजल्यापर्यंतचे मजले हॉटेल वापरासाठी असतील. हे हॉटेल सुरू होण्यासाठी अजून बरीच वर्षे लागणार आहेत. परंतु त्याची बातमी आता वाऱ्याच्या वेगासारखी पसरली आहे.