दाक्षिणात्य चित्रपटसृष्टीसोबतच बॉलिवूडमध्येही आपल्या दमदार अभिनयाची छाप सोडणारी अभिनेत्री समंथा रुथ प्रभूला Samantha Ruth Prabhu तिच्या घटस्फोटानंतर अनेक टीकांना सामोरं जावं लागलं, किंबहुना अजूनही जावं लागतंय. घटस्फोटावरून ट्रोल करणाऱ्या एका ट्विटर युजरला समंथाने तिच्याच अंदाजात उत्तर दिलं आहे. समंथाने नाग चैतन्यकडून पोटगी म्हणून ५० कोटी रुपये घेतल्याचा आरोप संबंधित ट्रोलरने केला आहे. २ ऑक्टोबर रोजी समंथा आणि नाग चैतन्य Naga Chaitanya यांनी सोशल मीडियावर पोस्ट लिहित घटस्फोट घेत असल्याचं जाहीर केलं. चार वर्षांच्या संसारानंतर या दोघांनी विभक्त होण्याचा निर्णय घेतला. घटस्फोटानंतर समंथावर अफेअर्स आणि गर्भपातासारखे गंभीर आरोप करण्यात आले.

'घटस्फोटीत समंथाने एका चांगल्या व्यक्तीकडून करमुक्त ५० कोटी रुपये उकळले आहेत', अशा शब्दांत एका ट्विटर युजरने टीका केली. त्यावर समंथाने उत्तर दिलं, 'देव तुमच्या आत्म्याला शांती देवो.' समंथा याआधीही ट्रोलर्सबाबत व्यक्त झाली होती. "आमच्या घटस्फोटाच्या वृत्ताने चाहते नाराज झाले हे मी मान्य करते, मात्र त्यांची नाराजी व्यक्त करण्याची पद्धत थोडी वेगळी असती तर बरं झालं असतं", असं ती म्हणाली होती.

घटस्फोटानंतर समंथाची पोस्ट-

'माझ्या वैयक्तिक संकटामध्ये तुम्ही जी मला भावनिक सहानुभूती दिली, ते पाहून मी खरोखर भारावून गेली आहे. तुम्ही दाखवलेल्या सहानुभूतीबद्दल, काळजीबद्दल आणि खोट्या अफवांपासून माझा बचाव केल्याबद्दल तुम्हा सर्वांचे मनापासून आभार मानते. ते म्हणतात, माझं अफेअर होतं, मला मूल नको होतं, मी संधीसाधू आहे आणि आता तर मी गर्भपात केला आहे अशीही अफवा पसरली आहे. घटस्फोटाची संपूर्ण प्रक्रिया अत्यंत क्लेशकारक असते. त्यातून बाहेर पडण्यासाठी मला थोडा वेळ द्या. माझ्या खासगी आयुष्यावर होणारे हे शाब्दिक हल्ले अत्यंत वाईट आहेत. पण मी तुम्हाला वचन देते, या गोष्टींमुळे आणि ते जे काही म्हणतील त्याने मी खचून जाणार नाही,' अशी पोस्ट तिने लिहिली होती.

घटस्फोटानंतर समंथा नुकतीच अल्लू अर्जुनच्या 'पुष्पा' या चित्रपटातील आयटम साँगमध्ये झळकली. १७ डिसेंबर रोजी प्रदर्शित झालेल्या या चित्रपटाचे चार दिवसांत १६ कोटींचा गल्ला जमवला आहे. आयटम साँगमधील समंथाच्या बोल्ड लूकचीही चर्चा होत आहे.