संजय लीला भन्साळी (Sanjay Leela Bhansali) दिग्दर्शित 'गंगुबाई काठियावाडी' (Gangubai Kathiawadi) या चित्रपटाच्या प्रदर्शनाची नवीन तारीख अखेर जाहीर झाली आहे. गेल्या काही महिन्यांपासून कोरोना आणि लॉकडाउनमुळे प्रदर्शनाची तारीख सतत पुढे ढकलली जात होती. आता हा चित्रपट येत्या २५ फेब्रुवारी रोजी चित्रपटगृहांमध्ये प्रेक्षकांच्या भेटीला येणार आहे. मार्च २०२० पासून या चित्रपटाचं प्रदर्शन पुढे ढकललं जात होतं. या चित्रपटात आलिया भट्टची (Alia Bhatt) मध्यवर्ती भूमिका असून ती गंगुबाई काठियावाडी हे पात्र साकारतेय. (Gangubai Kathiyawadi Release Date Confirm)

आलियाच्या करिअरमधील हा पहिलाच बायोपिक आहे. याचसोबत तिचा भन्साळींसोबतचा हा पहिलाच चित्रपट आहे. ट्रेलरमधील तिचा लूक, तिचं अभिनय अगदी नजरेत भरणारं असल्याने सोशल मीडियावर त्याची जोरदार झाली. आलियाला गंगुबाईंच्या भूमिकेत पाहणं ही प्रेक्षकांसाठी मोठी पर्वणीच असेल. (Gangubai Kathiyawadi Movie News)

कोण होत्या गंगुबाई काठियावाडी?

हुसैन झैदी यांच्या 'माफिया क्वीन्स ऑफ मुंबई' या पुस्तकातून भन्साळींना गंगूबाई हे पात्र सापडलं. गंगुबाई या कामाठीपुरात वेश्या व्यवसाय करत होत्या. त्या मूळच्या गुजरातच्या होत्या. वयाच्या अवघ्या १६ व्या वर्षी प्रेमविवाह करून त्या मुंबईत पळून आल्या होत्या. मात्र त्यांच्या पतीने केवळ ५०० रुपयांसाठी त्यांना वेश्या व्यवसायात ढकललं. कामाठीपुरात वेश्या व्यवसाय करताना गंगुबाईंचा अनेक गँगस्टरशी संपर्क आला. अशाच एका प्रसंगात त्यांची गाठ करीम लाला यांच्याशी पडली आणि त्यांनी त्याला राखी बांधत भाऊ मानलं. त्या घटनेनंतर करीम लालाने अवघा कामाठीपुराच गंगुबाईच्या हातात दिला, असं म्हटलं जातं. गंगुबाईंनी वेश्या व्यवसाय केला, मात्र त्यांनी कधीही कोणत्याही मुलीच्या इच्छेविरोधात तिला हा व्यवसाय करू दिला नव्हता, असंसुद्धा सांगितलं जातं. इतकंच नव्हे तर जेव्हा मुंबईतून वेश्या व्यवसाय काढून टाकण्यासाठी प्रयत्न सुरू झाले तेव्हा त्या आंदोलनाच्या नेतृत्वासाठी गंगुबाईंनी पुढाकार घेतला होता.