हरियाणवी डान्सर आणि गायिका सपना चौधरी कायमच तिच्या वादग्रस्त वक्तव्यांमुळे आणि वर्तनामुळे चर्चेत असते. एका लहानशा गावातून आलेल्या सपनाने कलाविश्वात १५ वर्ष पूर्ण केले आहेत. या १५ वर्षांच्या कारकिर्दीत तिने बरीच लोकप्रियता मिळवली. मात्र, अद्यापही हिंदी कलाविश्वात यशस्वीरित्या पदार्पण केलेलं नाही. त्यामुळे अनेकदा सपना बॉलिवूडमध्ये पदार्पण कधी करणार असा प्रश्न चाहत्यांना पडतो. मात्र, 'अंगप्रदर्शन करणारे कपडे घालत नसल्यामुळेच मला हिंदी कलाविश्वात काम मिळत नाही', असं सपनाने अलिकडेच झालेल्या मुलाखतीत म्हटलं आहे. (sapna chaudhary reveals her struggle in hindi film industry)

"याच वर्षी मला कलाविश्वात १५ वर्ष पूर्ण झाले आहेत. मला हिंदी चित्रपट आणि टीव्ही शोमध्ये काम करायची इच्छा आहे. परंतु, मी प्रादेशिक कलाविश्वातून आल्यामुळे कदाचित माझं टॅलेंज दाखवण्याची संधी मला मिळत नाही", असं सपना म्हणाली.

पुढे ती म्हणते, "मला अंगप्रदर्शन करणारे (तोकडे) कपडे परिधान करायला आवडत नाही. मी उत्तमरित्या इंग्लिश बोलू शकत नाही. इथे माझा कोणीच गॉडफादर नाहीये. त्यामुळेच मी अजूनही बॉलिवूडमध्ये पदार्पण करु शकले नाही. अजूनही हिंदी कलाविश्वात संधी मिळावी यासाठी मी स्ट्रगल करत आहे. ज्यावेळी तुमच्याजवळ एखाद्याचं काम असतं त्याचवेळी ते तुमच्याशी बोलायला येतात. या कलाविश्वात असे अनेक लोक आहेत जे सतत तुम्हाला जज करतात. अनेकदा माझ्याकडे पाहून डिझायनर्सने मला डिझायनर कपडे देण्यासाठीही नकार दिला आहे. मला माहित नाही मी अशा परिस्थितीत कसं काय तग धरू शकेन."

दरम्यान, सपना चौधरीने तिच्या करिअरची सुरुवात हरियाणाच्या ऑर्केस्ट्रापासून केली. त्यानंतर तिने स्टेज डान्स करण्यास सुरुवात केली. विशेष म्हणजे याच डान्सच्या जोरावर ती आज लोकप्रिय झाली असून तिने ‘बिग बॉस ११’ मध्ये सहभागही घेतला होता.