कर्नाटकातील हिजाब (Hijab) प्रकरणावर अभिनेत्री कंगनाने (Kangana Ranaut) तिच्या इंस्टाग्राम स्टोरीमध्ये एक पोस्ट शेअर करत लिहिले की "मुक्त होऊन जगायला शिका,स्वतःला पिंजऱ्यात ठेवू नका. हिम्मत दाखवायची असेल तर अफगाणिस्तानमध्ये हिजाब न घालता वावरून दाखवा." कंगनाच्या या विधानावर ज्येष्ठ अभिनेत्री शबाना आझमी (Shabana Azmi) यांनी भारत धर्मनिरपेक्ष आहे याची आठवण करून देत तिला प्रत्युत्तर दिलं आहे. "मी चुकत असेन तर मला सुधारा पण अफगाणिस्तान हा ईश्वरशासित (Theocratic) देश आहे.आणि जिथपर्यंत मला आठवते भारत हा एक धर्मनिरपेक्ष लोकशाही प्रजासत्ताक (Secular Democratic Republic) देश आहे." असे म्हणत त्यांनी कंगनाच्या मताचे खंडन केले आहे.

कर्नाटकमध्ये उडपीमधील एका महाविद्यालयात सहा विद्यार्थिनींना हिजाब घातला म्हणून प्रवेश नाकारण्यात आला. त्यानंतर त्या विद्यार्थिनींना शिक्षणा विभागात तक्रार केली. पण, मुलींनी महाविद्यालयीन गणवेशातच यावं, असं सांगण्यात आलं. त्यानंतर मुलींनी न्यायालयात धाव घेतली. मुली जर हिजाब घालून महाविद्यालयात आल्या, तर हिंदूत्ववादी विद्यार्थी भगवे शेले घेऊन येतील, अशी भूमिका काही हिंदूत्ववादी संघटनांनी घेतली आहे. त्यानंतर हा वाद आणखीच चिघळला.