ट्विटर Twitter या सोशल मीडिया प्लॅटफॉर्मचे मुख्य कार्यकारी अधिकारी (सीईओ) म्हणून पराग अग्रवाल Parag Agrawal यांची नियुक्ती करण्यात आली. पराग अग्रवाल यांच्या नियुक्तीनंतर सोशल मीडियावर विविध प्रतिक्रिया येत आहेत. अनेकांनी त्यांच्यावर शुभेच्छांचा वर्षाव केला आहे. यामध्ये बॉलिवूडची प्रसिद्ध गायिका श्रेया घोषालचाही Shreya Ghoshal समावेश आहे. श्रेयाने ट्विट करत पराग अग्रवाल यांना शुभेच्छा दिल्या दिल्या आहे. 'अभिनंदन पराग, तुझा खूप अभिमान आहे. आमच्यासाठी हा खूप मोठा दिवस आहे, तुझ्या नियुक्तीच्या बातमीचा आनंद आम्ही साजरा करतोय', असं श्रेयाने लिहिलं आहे.

अग्रवाल हे आयआयटी, मुंबईचे माजी विद्यार्थी आहेत. श्रेया आणि पराग हे अनेक वर्षांपासून एकमेकांचे चांगले मित्र आहेत. यासोबत श्रेया आणि पराग यांचे जुने फोटो सोशल मीडियावर व्हायरल होऊ लागले आहेत. पराग यांनी याआधी त्यांच्या इंस्टाग्राम अकाऊंटवर श्रेयासोबतचा एक फोटो पोस्ट केला होता. 2015 मध्ये श्रेया आणि शिलादित्य मुखोपाध्याय यांच्या लग्नातील हा फोटो असल्याचं दिसत आहे.

पराग अग्रवाल हे २०११ पासून ट्विटर कंपनीच्या सेवेत आहेत. २०१७ मध्ये त्यांची कंपनीचे 'सीटीओ' म्हणून नियुक्ती करण्यात आली होती. ट्विटरचे नवीन मुख्य कार्यकारी अधिकारी म्हणून अग्रवाल यांनी जॅक डॉर्सी Jack Dorsey यांची जागा घेतली आहे. अग्रवाल यांनी जॅक आणि संपूर्ण टीमबद्दल कृतज्ञता व्यक्त करणारे ट्विट केलं. जग आपल्याकडे पूर्वीपेक्षाही अधिक अपेक्षेने पाहत आहे. आपण ती अपेक्षापूर्ती करूया, असे अग्रवाल यांनी म्हटलं.