Smriti Irani Daughter Shanelle Wedding Destination : केंद्रीय मंत्री आणि पूर्वी टीव्ही मनोरंजन विश्वात आपल्या अभिनयानं प्रेक्षकांची पसंती मिळवलेल्या अभिनेत्री स्मृती इराणी या चर्चेत आल्या आहेत. त्यांच्या मुलीचं शनेलचं लग्न हे सात ते नऊ फेब्रुवारी दरम्यान पार पडणार असून त्यासाठी राजस्थानमधील जोधपूरमध्ये जोरदार तयारी करण्यात आली आहे.

यासगळ्यात ज्याठिकाणी इराणी यांच्या मुलीचं लग्न होणार आहे ते विवाहस्थळ सोशल मीडियावर चर्चेत आलं आहे. यापूर्वी शनेलच्या विवाहसोहळ्यातील काही फोटो व्हायरल झाले असून त्याला नेटकऱ्यांची पसंती मिळताना दिसते आहे. शनेलचा २०२१ मध्ये अर्जुन भल्लाशी साखरपुडा झाला होता. त्यानंतर अर्जुननं तिला जोधपूर आणि नागौरमधील खिंवसर किल्ल्यामध्ये प्रपोझही केलं होतं. याच ठिकाणी लग्न करायचं अशी त्यांची इच्छा होती.

खिंवसर किल्ला हा राजस्थानातील नागौर जिल्ह्यातील खिंवसर गावामध्ये असून तो पाचशे वर्ष जुना असल्याचे सांगण्यात येते. १५२३ मध्ये हा किल्ला राव करमसजी यांनी बांधला होता. ते जोधपुरचे राव जोधा यांचे आठवे पुत्र होते. १५ व्या शतकात तयार झालेल्या या किल्ल्याच्या एका बाजुला वाळवंट तर दुसऱ्या बाजुला सुंदर तळे आहे. राजस्थानला भेट देणाऱ्या पर्यटकांच्या यादीत या किल्ल्याचे नाव असतेच.

खिंवसर किल्ल्यामध्ये ७१ खोल्या असून ४ वेगवेगळे हॉटेल्स आहेत. २ बँकेट आणि मीटिंग व्हेन्यु आहेत. १८ लक्झरी हट्स गावं आहेत. अशा वेगवेगळ्या सोयीसुविधांनी परिपूर्ण असणाऱ्या या किल्ल्याची पर्यटकांना आणि मोठ्या सेलिब्रेटींना नेहमीच भुरळ पडत असल्याचे दिसून आले आहे.

स्मृती इराणी यांच्या मुलीविषयी सांगायचे झाल्यास, ती वकील असून तिचा २०२१ मध्ये अर्जुन भल्ला सोबत साखरपुडा झाला होता. आता अनेकांना त्यांच्या लग्नाची उत्सुकता असून तीन दिवस हा शाहीविवाह सोहळा चालणार असल्याची माहिती सुत्रांनी दिली आहे. या विवाहसोहळ्याला राजकीय, मनोरंजन, उद्योग क्षेत्रातील विविध मान्यवरही उपस्थित राहणार असल्याची चर्चा आहे.