Sonam Kapoor On Karva Chauth: बॉलीवूड अभिनेत्री सोनम कपूर नेहमीच काही ना काही कारणानं चर्चेत असते. सोनमचं सिने-करिअर भले फारसं काही चांगलं राहिलं नाही पण तिच्या फॅशन स्टाइलमुळे ती नेहमीच बातम्यांच्या हेडलाईनमध्ये राहिली. सध्या सोनम करवा चौथ व्रता संदर्भातील तिच्या विधानामुळे चर्चेत आहे. सोनमच्या लग्नाला चार वर्ष झाली आहेत. पण तिनं आतापर्यंत कधीच करवा चौथ हे व्रत केलं नाही. आणि नुकतंच तिनं यामागच्या कारणाचा खुलासा केला आहे. सोनम म्हणाली की तिचा पती आनंद आहूजामुळे ती हे व्रत करत नाही.(Sonam Kapoor On Karva chauth, actress trolled)

सोनम कपूरनं साडीमध्ये आपले काही फोटो करवा चौथच्या दिवशी शेअर केले होते. या फोटोंना कॅप्शन देत सोनमनं लिहिलं की, ''माझे पती आनंद आहूजा करवा चौथच्या व्रताला मानत नाही. कारण त्यांना वाटतं की त्या व्रतासाठी स्त्रिया कडक उपवास ठेवतात त्यापेक्षा त्यांनी इंटरमिंटेंट डाएट(ठरलेल्या वेळेत थोडं-थोडं खाणे) करुन स्वतःची प्रकृती उत्तम ठेवायला हवी. त्यामुळे मी हे व्रत ठेवत नाही. पण आमच्या दोघांचा आपले सण-परंपरा यांवर विश्वास आहे. कारण या गोष्टी कुटंबाला एकत्र बांधून ठेवतात. मला खूप चांगलं वाटतं जेव्हा माझी आई खूप प्रेमाने-हौशेने हा सण साजरा करते. आणि मी जरी हे व्रत करत नसले तरी त्या परंपरेचा भाग मात्र मी नक्कीच बनते''. असं स्पष्ट मत व्यक्त करत सोनमने आपल्या चाहत्यांना करवा चौथच्या शुभेच्छा दिल्या.

सोनम कपूरच्या या पोस्टवर संमिश्र प्रतिक्रिया उमटलेल्या पहायला मिळाल्या. एकीकडे जिथे हिंदू धर्माच्या परंपरेचा भाग न बनण्यावर सोनमला ट्रोल केलं गेलं,तिकडे दुसरीकडे काही चाहत्यांनी सोनमच्या या विचारांचं समर्थन केलं. सोनमनं बाळाला जन्म दिल्यानंतर इतकं पटकन वजन कसं कंट्रोल केलं याविषयी देखील चाहत्यांनी तिचं कौतूक करत तिला त्यावर सल्लाही देण्यास सांगितला आहे. सोशल मीडियावर सोनमचे हे फोटो भलतेच व्हायरल झाले आहेत.

सोनम कपूरनं आनंद आहूजासोबत २०१८ मध्ये लग्न केलं होतं. सोनमच्या लग्नाचे फोटो आणि व्हिडीओ खूप व्हायरल झाले होते. अनेक सेलिब्रिटींनी तिच्या लग्नसोहळ्यात हजेरी लावली होती. अनिल कपूर यांनी तेव्हा मीडियाचा देखील पाहुणचार चांगला केला होता ज्याचं खूप कौतूकही झालं होतं. २० ऑगस्ट,२०२२ रोजी सोनमनं आपल्या पहिल्या अपत्याला जन्म दिला. सोनम आणि आनंद आहुजा यांच्या मुलाचं नाव वायु आहे.