मुंबई : कोरोना विरुद्धच्या लढाईमध्ये मदत करणाऱ्या कलाकार मंडळींची यादी भली मोठी आहे. आर्थिक तसेच धान्य, जेवणाच्या स्वरूपात कलाकार गरजूंना मदत करत आहेत. काही कलाकारांनी तर चक्क त्यांचे हॉटेल्स, ऑफिस विलगीकरण कक्षासाठी देऊ केले आहेत. तर काहींनी पोलिस कर्मचाऱ्यांना ड्युटी दरम्यान आराम करता यावा म्हणून हॉटेल्सची सोय करून दिली आहे. कलाविश्वातून मदतीचा ओघ सुरु असताना अभिनेता सोनू सुदनेही एक कौतुकास्पद काम केलं आहे. सोनूने गरजूंना रमजान गिफ्ट दिलं आहे. सोनूने त्याच्या अधिकृत सोशल मीडिया अकाऊंटवरुन मदतीचा एक व्हिडिओ देखील शेअर केला आहे. एकत्रित येऊन मदत करा असेही त्याने म्हटले आहे. 

हे ही वाचा ; विकी कौशलने केला लॉकडाऊनचा भंग? हैराण झालेल्या विकीने दिली अशी प्रतिक्रिया..

रमजान महिन्यात जवळपास 25 हजार गरजूंना जेवण पुरवण्याचा निर्णय सोनूने घेतला आहे. याचबाबत सोनू म्हणतो, सध्या देशात निर्माण झालेल्या परिस्थितीमध्ये आपण सगळ्यांनी एकत्र येणं फार गरजेचं आहे. एकमेकांना मदतीचा हात प्रत्येकाने पुढे करायला हवा. रमजान महिन्यात एकही गरजू उपाशी राहू नये म्हणून मी हा छोटासा प्रयत्न करत आहे. दिवसभर उपवास केल्यानंतर रात्रीचं जेवण व्यवस्थित मिळावं म्हणून आम्ही जेवण पुरवणार आहोत.`

भिवंडी येथे राहणाऱ्या 25 हजार गरजूंसाठी सोनूने ही सोय केली आहे. बंगाल, कर्नाटक, उत्तरप्रदेश, बिहार या शहरांमधून आलेले बरेच कामगार या भागात आहेत. त्यांना सोनूच्या या मदतीचा पुरेपूर उपयोग होणार आहे. शिवाय भिवंडी येथील तळहातावर काम असणाऱ्या कामगारांच्चा पोटाचा प्रश्न महिनाभरासाठी तरी आता सुटला आहे. एक वेळचं चांगलं आणि पौष्टीक जेवण या कामगारांना आणि गरजूंना उपलब्ध होणार आहे. 

याआधीही सोनूने बरीच आर्थिक मदत देखील केली आहे. शिवाय त्याने मुंबईमधील आपलं एक पूर्ण हॉटेलच डॉक्टर, नर्सेस यांना राहण्यासाठी दिलं आहे. त्याचबरोबरीने जवळपास 45 हजार गरजूंसाठी सोनू जेवणाची, धान्याची सोय करत आहे. सोनू सध्या करत असलेलं हे काम इतरांनाही प्रेरणा देणारं आहे.