पुणे - राज्य सरकारच्या सांस्कृतिक कार्य संचालनायलयातर्फे आयोजित ६२ व्या राज्य हौशी मराठी नाट्य स्पर्धेत पुणे केंद्रावरील प्राथमिक फेरीत ‘मंगल थिएटर्स, पुणे’ या संस्थेच्या ‘लगीन’ या नाटकाने प्रथम पारितोषिक पटकावले. तसेच ‘मॉडर्न महाविद्यालय, पुणे’ या संस्थेच्या ‘द सिक्रेट ऑफ लाईफ’ या नाटकास द्वितीय पारितोषिक जाहीर झाले. या दोन्ही नाटकांची अंतिम फेरीसाठी निवड झाली आहे.

सांस्कृतिक कार्य संचालनालयाचे संचालक बिभीषण चवरे यांनी प्रसिद्धी पत्रकाद्वारे ही घोषणा केली. ‘शब्दधन सोशल फाउंडेशन, पुणे’ या संस्थेच्या ‘बैदा’ या नाटकाने तृतीय पारितोषिक पटकावले. ‘लगीन’ या नाटकासाठी विनोद रत्ना यांनी आणि ‘द सिक्रेट ऑफ लाईफ’ या नाटकासाठी शुभंकर वाघोले यांनी अनुक्रमे दिग्दर्शनाचे प्रथम व द्वितीय पारितोषिक पटकावले.

भरत नाट्य संशोधन मंदिरात २० नोव्हेंबर ते १४ डिसेंबर या कालावधीत ही स्पर्धा जल्लोषात पार पडली. या स्पर्धेत एकूण २३ नाट्यप्रयोग सादर करण्यात आले. प्रत्येक प्रयोगाला रसिकांची लक्षणीय उपस्थिती लाभली. संपूर्ण स्पर्धेदरम्यान सुमारे सात हजार तिकिटांची विक्री झाली. या स्पर्धेसाठी परीक्षक म्हणून जुगलकिशोर ओझा, चंद्रकांत झाडकर आणि अनुया बाम यांनी काम पाहिले.

अन्य पारितोषिके -

१) प्रकाशयोजना - प्रथम - निखिल मारणे, द्वितीय - अभिप्राय कामठे

२) नेपथ्य - प्रथम - ऋतुजा बोढे, द्वितीय - विजय वाघ

३) रंगभूषा - प्रथम - अरविंद सुर्य, द्वितीय - सचिन थोरात

४) उत्कृष्ट अभिनय रौप्यपदक - राघवेंद्र कुलकर्णी आणि उन्नती कांबळे

५) अभिनयासाठी गुणवत्ता प्रमाणपत्रे - नेहा नाईक, कीर्ती कदम, शीतल इनामदार, देविका भोसले, अनुष्का पानसरे, अक्षय काळकुटे, अमोद देव, योगेश सातपुते, सुनील शिंदे, सुहास संत