देशभरात १ एप्रिलपासून ४५ वर्षांवरील नागरिकांनाही कोरोना प्रतिबंधक लस देण्यात येत आहे. ही लस घेण्यासाठी कलाविश्वातील अनेक कलाकार पुढे सरसावले आहेत. मराठीतील आघाडीचा अभिनेता सुबोध भावेनं पत्नीसह लशीचा पहिला डोस घेतला आहे. सोशल मीडियावर फोटो पोस्ट करत त्याने याबद्दलची माहिती दिली. यासोबतच त्याने चाहत्यांना काळजी घेण्याचं आवाहन केलं आहे. 'लस घेतली तरी काळजी घ्यायचीच आहे', असं त्याने या फोटोच्या कॅप्शनमध्ये लिहिलंय. 

सुबोध भावेसह त्याच्या कुटुंबीयांना झाली होती कोरोनाची लागण
गेल्या वर्षी ऑगस्ट महिन्यात सुबोध भावे, त्याची पत्नी मंजिरी आणि मोठा मुलगा कान्हा यांना कोरोनाची लागण झाली होती. तिघांनीही स्वत:ला घरीच क्वारंटाइन करून घेतलं होतं. 

देशात १६ जानेवारी २०२१ पासून लसीकरणाला सुरुवात झाली. त्यात वैद्यकीय कर्मचाऱ्यांसाठी सर्वांत प्रथम लस उपलब्ध करून देण्यात आली. त्यानंतर १ फेब्रुवारीपासून पहिल्या फळीतील कर्मचाऱ्यांसाठीच्या लसीकरणाला सुरुवात झाली. तर १ मार्चपासून सुरू झालेल्या तिसऱ्या टप्प्यात वयाची ६० वर्षे पूर्ण झालेले ज्येष्ठ नागरिक आणि वयाची ४५ वर्षे पूर्ण होण्यासह सहव्याधी असलेले नागरिक यांच्या लसीकरणाला प्रारंभ झाला. आता १ एपिलपासून ४५ वर्षांवरील सर्व नागरिकांना लस देण्यास सुरुवात झाली. मुंबई १०८ केंद्रांवर ही मोहीम सुरू झाली आहे. 

हेही वाचा : 'किमान तुझी बायको तरी कुरुप नाही'; नवऱ्यासाठी श्रेया बुगडेची पोस्ट

राज्यात करोनाच्या दैनंदिन रुग्णवाढीने गुरुवारी नवा उच्चांक नोंदवला. गेल्या २४ तासांत राज्यात ४३,१८३ नव्या रुग्णांचे निदान झाले, तर २४९ रुग्णांचा मृत्यू झाला. राज्यात उपचार सुरू असलेल्या रुग्णांची संख्या ३,६६,५३३ झाली आहे. त्यातील सर्वाधिक ६४,५९९ रुग्ण पुण्यात असून, मुंबईतील ५४,८०७ रुग्णांचा समावेश आहे.