अभिनेता सुशांत सिंह राजूपतसोबत 'एम. एस. धोनी' आणि अक्षय कुमारसोबत 'केसरी' या चित्रपटात काम केलेला अभिनेता संदीप नाहरचा संशयास्पद मृत्यू झाल्याची माहिती समोर येत आहे. संदीपने आत्महत्या केल्याचा प्राथमिक अंदाज वर्तवला जात आहे. मुंबईतील गोरेगाव इथल्या राहत्या घरी गळफास घेतलेला संदीपचा मृतदेह आढळला. 

संध्याकाळी संदीप त्याच्या रुममध्ये गेला आणि त्याने आतून दरवाजा बंद करून घेतला. बराच वेळ होऊनही तो रुमच्या बाहेर न आल्याने पत्नीला संशय आला. दरवाजा ठोठावूनही संदीपने आतून कोणताच प्रतिसाद दिला नाही. तेव्हा त्याच्या पत्नीने संदीपच्या मित्रांना याबाबतची माहिती दिली. त्यानंतर कारपेंटरच्या मदतीने दरवाजा उघडण्यात आला आणि रुममध्ये संदीपने गळफास घेतल्याचं दिसून आलं. संदीपला रुग्णालयात दाखल केल्यानंतर डॉक्टरांनी त्याला मृत घोषित केलं. ही संपूर्ण घटना झाल्यानंतर संध्याकाळी साडेसात वाजताच्या दरम्यान पोलिसांना यासंदर्भातली माहिती देण्यात आली. 

फेसबुक पोस्टमुळे खळबळ
संदीपने फेसबुकवर व्हिडीओ पोस्ट करत पत्नीसोबत असणारे मतभेत सांगितले होते. "मला तुम्ही अनेक चित्रपटांमध्ये पाहिलं असेल. एम. एस. धोनी चित्रपटात मी छोटू भैय्याची भूमिका साकारली होती. मी सध्या मानसिकदृष्ट्या स्थिर नाही आणि याला कारणीभू माझी पत्नी कंचन शर्मा आहे. गेल्या दीड-दोन वर्षांपासून मी हा त्रास सहन करतोय. आमची सतत भांडणं होत आहेत. आता हे सर्व माझ्या सहनशक्तीपलीकडे गेलंय. माझी पत्नी आणि आई यांनी मला कधीच समजून घेण्याचा प्रयत्न केला नाही", असं तो या व्हिडीओत म्हणाला होता. 

संदीपच्या आकस्मिक मृत्यूने सिनेसृष्टीवर शोककळा पसरली आहे. संदीपचा मृतदेह शवविच्छेदनासाठी पाठवण्यात आला असून पोलीस याप्रकरणी पुढील तपास करत आहेत.