मराठी मालिका आणि चित्रपटांमधून प्रेक्षकांच्या भेटीस येणारी अभिनेत्री तेजश्री प्रधान (tejashree pradhan) तिच्या अभिनयाने नेहमीच प्रेक्षकांची मनं जिंकते. 'अग्गंबाई सासूबाई' या मालिकेमध्ये तेजश्रीने शुभ्राची भूमिका साकारली होती. तिच्या या भूमिकेला प्रेक्षकांची पसंती मिळाली. या मालिकेत सोहम ऊर्फ बबड्याची आणि शुभ्राची जोडी प्रेक्षकांना आवडली. काही दिवसांपूर्वी बबड्या ही भूमिका साकारणारा अभिनेता आशुतोष पत्कीने (ashutosh patki) तेजश्रीच्या वाढदिवसानिमित्त सोशल मीडियावर खास पोस्ट लिहिली होती. त्या पोस्टनंतर आशुतोष आणि तेजश्री डेट करत आहेत अशी चर्चा सुरू झाली. त्यावर एका मुलाखतीमध्ये तेजश्रीने उत्तर दिले आहे. (tejashree pradhan on relationship rumours with aggabai sasubai fame ashutosh patki)

आशुतोषसोबतच्या नात्याबद्दल तेजश्री म्हणली, 'आशुतोष माझा खूपच जवळचा मित्र आहे आणि म्हणूनच त्याने तो फोटो माझ्या वाढदिवसानिमित्त पोस्ट केला. आमच्यात काही सुरु तर नाही ना अशी चर्चा मालिका सुरु असतानादेखील व्हायची. त्यामुळे माझ्यासाठी हे काही नवीन नाही. पण आमच्यात मैत्रीपलीकडे काहीच नाही.'

आशुतोष ने पोस्टमध्ये लिहिले होते, 'माझी प्रिय मैत्रीण, मला तुला हे सांगायचं आहे की तू माझ्यासाठी खूप महत्त्वाची आहेस आणि आपली मैत्री मी कायम जपेन. माझी नेहमीच साथ दिल्याबद्दल, मला प्रोत्साहित केल्याबद्दल आणि एक अभिनेता,एक माणूस म्हणून मला घडण्यास मदत केल्याबद्दल तुझे खूप आभार. या वाढदिवशी मी तुला दोन टिप्स देणार आहे. सर्वांत पहिलं म्हणजे, भूतकाळ विसर कारण ते तू बदलू शकत नाहीस आणि दुसरं म्हणजे प्रेझेंट (भेटवस्तू) विसर, कारण मी तुला देऊ शकलो नाही. वाढदिवसाच्या शुभेच्छा'. मालिकेच्या शूटिंगदरम्यान तेजश्री आणि आशुतोष यांच्यात खूप चांगली मैत्री झाली. दोघांच्या आवडीनिवडीसुद्धा सारख्याच असल्याने मैत्री करण्यासाठी त्यांना फार वेळ लागला नाही. मालिका सध्या बंद झाली असली तरी शुभ्रा आणि सोहमची जोडी प्रेक्षकांना अजूनही लक्षात आहे.