मुंबई वाढत्या कोरोना रुग्णसंख्येमुळे पुन्हा एकदा लॉकडाउनची भीती सतावतेय. यामुळे कलाविश्वातील कित्येक ज्युनिअर आर्टिस्ट आणि निर्माते चिंतेत आहे. दोन वर्षांनंतर आता कुठे परिस्थिती सुधारेल असं वाटत असतानाच पुन्हा एकदा त्यांच्यावर लॉकडाउनची टांगती तलवार आहे. याच ताणामुळे एका अभिनेत्याने आत्महत्येचा प्रयत्न केला. कलाविश्वात गेल्या पंधरा वर्षांपासून सक्रीय असणारा अभिनेता तीर्थानंद (Teerthanand) याने विष पिऊन आत्महत्येचा प्रयत्न केला. २७ डिसेंबरच्या संध्याकाळी ही घटना घडली. सुदैवाने त्याच्या शेजाऱ्यांना याविषयी वेळीच समजल्याने त्यांनी त्याला रुग्णालयात दाखल केलं आणि तीर्थानंदचे प्राण वाचले. चार दिवस रुग्णालयात राहिल्यानंतर तीर्थानंदला डिस्चार्ज देण्यात आला आहे. तीर्थानंद हा हुबेहूब नाना पाटेकरांची नक्कल करायचा. त्याने 'द कपिल शर्मा शो'मध्येही काम केलं होतं.

आर्थिक परिस्थिती आणि कौटुंबिक समस्यांमुळे घेतलं विष

एका वृत्तवाहिनीशी बोलताना तीर्थानंद म्हणाला, 'आधीच आर्थिक समस्या असताना कुटुंबीयांनीही माझी साथ सोडली. मी रुग्णालयात असतानाही आई किंवा भाऊ मला भेटायला आले नव्हते. आम्ही एकाच कॉम्प्लेक्समध्ये राहतो. माझे कुटुंबीय माझ्याशी बोलत नाहीत. माझ्यावर कर्जाचं ओझं आहे. जिच्यासोबत लग्न केलं, तिने पळून दुसऱ्याशी लग्न केलं. माझ्या मुलीसोबतही माझा संपर्क नाही '

'माझ्या कामाने मला ओळख आणि पैसा दिला. मात्र आता पुन्हा मी हिरोवरून झिरो झालो आहे. जवळपास आठ विविध भाषांमध्ये मी काम केलंय. नाना पाटेकर यांसारखा हुबेहूब दिसणारा म्हणून मला ओळखायचे. मी त्यांची नक्कल करायचो. मात्र कोरोना महामारी आणि लॉकडाउनमुळे माझी परिस्थिती खूप वाईट झाली आहे. जी काही कामं मिळत होती, त्याचेही पैसे रखडले आहे', अशा शब्दांत तीर्थानंदने दु:ख व्यक्त केलं. तीर्थानंदने २०१६ मध्ये कपिल शर्माच्या शोमध्ये काम केलं होतं. 'कॉमेडी सर्कस'मध्येही त्याने भाग घेतला होता.