'द लंचबॉक्स' The Lunchbox या चित्रपटाच्या कास्टिंग डायरेक्टर आणि निर्माती सेहेर अली लतिफ Seher Aly Latif यांचं मुंबईत निधन झालं. कार्डिअॅक अरेस्टने ७ जून रोजी त्यांचं निधन झालं. सेहेर यांचं वय चाळीशीत असल्याचं म्हटलं जात आहे. मूत्रपिंड निकामी झाल्याने सेहेर यांना जवळपास आठ दिवसांपूर्वी लिलावती रुग्णालयात दाखल करण्यात आलं होतं. दिग्दर्शक नीरज उधवानी यांनी याबद्दलची माहिती दिली. 'म्युटंट फिल्म्स' या स्वतंत्र निर्मिती कंपनीच्या या सहसंस्थापक होत्या. 'नेटफ्लिक्स' या ओटीटी प्लॅटफॉर्मवरील 'भाग बिनी भाग' या वेब सीरिज आणि 'मस्का' या चित्रपटाची निर्मिती त्यांनी केली होती. (The Lunchbox casting director Seher Aly Latif dies of cardiac arrest in Mumbai)

सेहेर यांच्या निधनाच्या वृत्तानंतर बॉलिवूडमधील अनेक कलाकारांनी शोक व्यक्त केला. 'द लंचबॉक्स' या चित्रपटात मुख्य भूमिका साकारणारी अभिनेत्री निम्रत कौरने ट्विट करत लिहिलं, 'माझ्या आयुष्यातील सर्वांत प्रेमळ आणि दयाळू व्यक्ती. निधनाचं वृत्त मला अजूनही खोटं वाटतंय', अशा शब्दांत निम्रतने दु:ख व्यक्त केलं. दिग्दर्शक रितेश बत्रा, अभिनेत्री स्वरा भास्कर यांनीसुद्धा सोशल मीडियाद्वारे सेहेर यांना श्रद्धांजली वाहिली.

'शकुंतला देवी', 'दुर्गामती' यांसारख्या बॉलिवूड चित्रपटांसाठी त्यांनी कास्टिंग डायरेक्टर म्हणून काम केलं. 'ईट प्रे लव्ह', 'झिरो डार्क थर्टी', 'मॅकमाफिया', 'सेन्स8', 'फ्युरियस ७' आणि 'हंड्रेड फूट जर्नी' या चित्रपटांसाठीही त्यांनी काम केलं होतं. अक्षय कुमारच्या 'गोल्ड' या चित्रपटाची सहनिर्मिती सेहेर यांनी केली होती.