अभिनेता टायगर श्रॉफ (Tiger Shroff) त्याच्या आगामी 'गणपत' (Ganapath) या चित्रपटाच्या शूटिंगमध्ये व्यग्र आहे. युकेमध्ये या चित्रपटाची शूटिंग सुरू असून यादरम्यान त्याच्या डोळ्याला दुखापत झाली. टायगरने दुखापतीचा फोटो त्याच्या इन्स्टाग्राम स्टोरीमध्ये पोस्ट केला आहे. या फोटोमध्ये त्याचा डोळा सुजल्याचं पहायला मिळतंय. चित्रपटाच्या सेटवरच त्याने हा फोटो काढल्याचं पहायला मिळत आहे. गेल्या काही दिवसांपासून युकेमध्ये चित्रपटाची शूटिंग सुरू आहे. या शूटिंगदरम्याने काही व्हिडीओ तो सतत सोशल मीडियावरील चाहत्यांसोबत शेअर करतोय. 'कभी खुशी कभी गम' या चित्रपटाला २० वर्षे पूर्ण झाल्याच्या निमित्ताने त्याने 'यु आर माय सोनिया' या गाण्यावरील डान्सचा व्हिडीओसुद्धा पोस्ट केला होता.

'गणपत' या चित्रपटात तो क्रिती सनॉनसोबत मुख्य भूमिका साकारतोय. या अॅक्शन-थ्रिलर चित्रपटाचं दिग्दर्शन विकास बहल करतोय. टायगर आणि क्रितीने 'हिरोपंती' या चित्रपटातही एकत्र काम केलं होतं. गेल्या महिन्यातच या चित्रपटाच्या शूटिंगला सुरुवात झाली. विकास, वाशु भगनानी, दीप्शिका देशमुख आणि जॅकी भगनानी या चौघांनी मिळून चित्रपटाची निर्मिती केली आहे. हा चित्रपट २३ डिसेंबर २०२२ रोजी प्रदर्शित होणार आहे.

फिटनेसच्या बाबतीत सजग असलेल्या जॉन अब्राहम, विद्युत जामवाल, सोनु सूद, अक्षय कुमार या मोजक्या स्टार्समध्ये टायगर श्रॅाफचंही नाव घेतलं जातं. पीळदार शरीरयष्टी, रूबाबदार व देखणं व्यक्तिमत्व असलेला टायगर श्रॉफ हा असंख्य तरुणींच्या गळ्यातील ताईत आहे. आपल्या भूमिकेसाठी कुठलीही कसूर न सोडणाऱ्या नव्या पिढीच्या कलावंतांमध्ये तो टॉपवर आहे.