बिग बॉस मराठीचा तिसरा सिझन सुरु झाला आहे. या सिझनमध्ये सामाजिक कार्यकर्त्या तृप्ती देसाई यादेखील बिग बॉसच्या घरात असणार असल्याचं स्पष्ट झालंय. नेहमीप्रमाणे दिग्दर्शक महेश मांजरेकर या कार्यक्रमाचं सूत्रसंचालन करणार आहेत. बिग बॉस मराठी या रिअॅलिटी शोचा हा तिसरा सिझन असून यंदा मनोरंजन क्षेत्रातील 15 कलाकार सहभागी होणार आहेत. ते 100 दिवसांपेक्षा जास्त काळ बिग बॉसच्या घरात बंद राहतील.

कोण कोण आहेत यावेळचे स्पर्धक?

• तृप्ती देसाई - तृप्ती देसाई या सामाजिक कार्यकर्त्या आहेत. त्यांनी धार्मिक स्थळांमध्ये महिलांना प्रवेश मिळवण्यासाठी अनेक आंदोलनं केली आहेत.

• डॉ. उत्कर्ष आनंद शिंदे- गायक उत्कर्ष शिंदे हे बिग बॉसच्या घरातील स्पर्धकांपैकी एक असतील.

• सोनाली पाटील - कोल्हापूरच्या सोनाली पाटील यांना टिकटॉक या सोशल मीडिया प्लॉटफॉर्मने ओळख मिळवून दिली आहे. देवमाणूस या मालिकेत त्यांनी अँडव्होकेट आर्याची भूमिका साकारली होती.

• मीरा जगन्नाथ- मीरा यांनी माझ्या नवऱ्याचीची बायको या मालिकेत संजनाची भूमिका साकारली होती. येऊ कशी कशी मी नांदायला या मालिकेमध्ये देखील त्यांनी काम केलं आहे.

• आविष्कार दारव्हेकर- आविष्कारनं आभाळमाया, या गोजिरवाण्या घरात या मालिकांमध्ये काम केलं आहे

• विशाल निकम- विशाल निकम हे अभिनेते असून साता जन्माच्या गाठी या मालिकेतून त्यांना प्रसिद्धी मिळाली होती.

• स्नेहा वाघ- स्नेहा वाघ या हिंदी आणि मराठी मालिकेतला प्रसिद्ध चेहरा आहेत. स्नेहाने अधुरी एक कहाणी, काटा रुते कोणाला या मराठी मालिकांमध्ये काम केलं होतं.