उठा उठा पहाट झाली, मोती साबणाची वेळ झाली..

दिवाळीतील ही जाहिरात अनेकांना चांगलीच लक्षात असेल. या जाहिरातीवर अनेक मीम्सदेखील तयार झाले. पण गेली अनेक वर्षे, या जाहिरातीने प्रेक्षकांच्या मनावर विशेष छाप सोडली आहे. याच जाहिरातीतील आजोबा विद्याधर करमरकर Vidyadhar Karmarkar यांचं निधन झालं. ते ९६ वर्षांचे होते. मोती साबणाच्या जाहिरातीतील 'उठा उठा पहाट झाली..' या त्यांच्या तोंडी असलेल्या डायलॉगमुळे त्यांना 'अलार्म काका' म्हणूनही ओळखलं जात होतं. विद्याधर हे अनेक जाहिरातींमध्ये झळकले होते. विद्याधर यांना लहानपणापासूनच अभिनयाची आवड होती. Vidyadhar Karmarkar Death

दिवंगत अभिनेते बलराज सहानी यांच्यासोबत विद्याधर यांनी नाटकांतून कामं केली आणि त्यांच्याच प्रेरणेने कठपुतळीची कला त्यांनी जोपासली. कळपुतली या हिंदी चित्रपटातील एका गाण्यात त्यांनी आपल्या हातांनी कठपुतळ्या नाचवल्या होत्या. इतकंच नव्हे तर प्रसिद्ध 'जहाँ मै जाती हूँ वही चले आते हो' या गाण्यातील कठपुतळ्यांची कमालसुद्धा विद्याधर यांचीच होती. 'इंडियन पपेट थिएटर'च्या माध्यमातून त्यांनी देशभरात कळपुतळीची कला दाखवली.

विद्याधर यांनी अभिनेते संजीव कुमार, अभिनेत्री सायरा बानो यांनासुद्धा अभिनयाचे धडे दिले होते. अभिनयासोबतच त्यांनी लेखनसुद्धा केलं होतं. विविध वर्तमानपत्रे, मासिके यांच्यासाठी ते नियमितपणे लेखन करायचे. विशेष म्हणजे सेंट्रल टेलिग्राफ ऑफसमधील नोकरी करत हे अभिनयाचा छंद जोपासायचे.