मुंबईतील दादर परिसरात आंदोलन करणाऱ्या रंगकर्मींना पोलिसांनी ताब्यात घेतलं आहे. विजय पाटकर, मेघा घाडगेसह रंगकर्मींना दादर पोलिसांनी ताब्यात घेतलं आहे. महाराष्ट्रातील रंगकर्मींनी सोमवारी दादर इथं विविध मागण्यांसाठी आंदोलन केलं. कोरोनाच्या प्रादुर्भावामुळे प्रभावित होऊन मनोरंजन विश्व गेले दिड वर्ष ठप्प आहे. मानसिक तसेच आर्थिक विवंचनेत सापडलेल्या कलावंतांच्या वेदनेचा आक्रोश शासनाला कळावा यासाठी ‘रंगकर्मी आंदोलन महाराष्ट्र’ यांच्या वतीने क्रांतीदिनाचे औचित्य साधून महाराष्ट्रभर राज्यव्यापी आंदोलन करण्यात आले. या आंदोलनामध्ये विजय पाटकर, मेघा घाडगे, मिलिंद दस्ताने, विनय गिरकर, संदेश उमप, उमेश ठाकूर यांच्यासह अनेक कलाकार, बॅकस्टेज कलाकार, मिमिक्री आर्टिस्ट, ऑर्केस्ट्रा कर्मचारी सहभागी झाले होते.

अभिनेते विजय पाटकर यांच्या नेतृत्वाखाली स्व. दादासाहेब फाळके यांच्या स्मारकाशेजारी हे आंदोलन केले गेले. अनेक रंगकर्मीनी आपल्या कलांचे सादरीकरण यावेळी केले. ‘जागर रंगकर्मींचा’ हा कार्यक्रम सादर करून कलाकारांनी आपल्या मागण्या यावेळी मांडल्या. आंदोलन करणाऱ्या विजय पाटकर, विजय राणे, मेघा घाडगे, संचित यादव, शीतल माने या रंगकर्मीना यावेळी भोईवाडा पोलिसांनी ताब्यात घेतलं.

मुख्यमंत्री, उपमुख्यमंत्री व सांस्कृतिक मंत्री यांच्याकडून ठोस आश्वासन मिळत नाही तसेच मागण्या मान्य होत नाही तोपर्यंत भोईवाडा पोलिस स्टेशन बाहेरच ‘ठिय्या आंदोलन’ करण्याचा पवित्रा सर्व रंगकर्मीनी घेतला आहे.

सिनेमा, मालिका, नाटक क्षेत्रातील कलाकार तंत्रज्ञांसोबतच तमाशा, भजन, कीर्तन, भारुड, गोंधळ, जागरण, पोवाडा, लावणी, दशावतार, डोंबारी, लेझीम, वासुदेव, पोतराज, नंदीबैल, पिंगुळा, भराड इ.लोककला सादर करणाऱ्या तसेच वाद्यवृंद क्षेत्रातील १००० हून अधिक कलाकार या आंदोलनात सहभागी झाले आहेत.

काय आहेत कलाकारांच्या प्रमुख मागण्या?

कलाकार पेन्शन योजनेचा लाभ घेण्यासाठी असलेल्या अटींमध्ये शिथिलता आणावी. तसेच मानधनाच्या रकमेत वाढ करावी.

रंगकर्मी हा असंघटित आहे, माथाडी कामगारांच्या धर्तीवर रंगकर्मी बोर्डाची स्थापना करावी.

मुंबईत कला सादर करण्यासाठी येणाऱ्या कलाकरांना भाडेतत्वावर देण्यासाठी शासनातर्फे बांधण्यात येणाऱ्या निवासी गाळ्यांमध्ये प्राधान्याने व सवलतीच्या दरात सोय करण्यात यावी. तसेच प्रत्येक जिल्हाच्या ठिकाणी रंगकर्मींसाठी विश्रामगृहात सोय असावी.

शासनाने रंगकर्मींसाठी राखीव ठेवलेल्या म्हाडा व सिडकोच्या घरांसाठीच्या संख्येत ५% ने वाढ करावी.

निराधार वयोवृध्द रंगकर्मीसाठी शासकीय आणि खाजगी वृध्दाश्रमात प्राधान्याने व्यवस्था करावी सोबतच त्यांची जबाबदारी शासनाने घ्यावी.

महाराष्ट्रातील सरकारी तसेच नगरपालिका / जिल्हापरिषद हॉस्पिटल मध्ये रंगकर्मींसाठी राखीव 'बेड असावेत.