Hardik Joshi Shivsena News: तुझ्यात जीव रंगला मालिकेतील राणादा म्हणजेच अभिनेता हार्दिक जोशी आणि अन्य मराठी कलाकारांनी एकनाथ शिंदेंच्या शिवसेना पक्षात प्रवेश केला.

मराठी कलाकारांचा शिवसेना पक्षात प्रवेश होणं ही सर्वांसाठी आश्चर्यकारक गोष्ट होती. अशातच राणादा म्हणजेच अभिनेता हार्दिक जोशीने एकनाथ शिंदेंच्या शिवसेनेत प्रवेश का केला याचं कारण सांगीतलंय.

(Why Eknath Shinde's Shiv Sena? hardeek joshi finally explained the reason)

मिडीयाने दिलेल्या वृत्तानुसार हार्दिक जोशीने शिवसेनेत प्रवेश का केला याची कारणं सांगीतली आहेत.

हार्दिक म्हणाला, “शिव चित्रपटसेना ही संघटना आज सुरू करण्यात आली. या संघटनेतुन कलाकारांसाठी काम करण्यात येणार आहे. सुशांत शेलार या संघटनेचा अध्यक्ष आहे.

सुशांतच्या मार्फत आम्ही या संघटनेत सामील झालो. प्रत्येकाला वाटत असतं की आपण ज्या क्षेत्रात काम करत आहोत त्यातील लोकांना आपण मदत केली पाहिजे पण त्याचा मार्ग सापडत नाही. तो मार्ग आज मला मिळाला आहे असं मला वाटतं.”

हार्दिक पुढे म्हणाला, “कोणत्याही प्रकारचं राजकारण नसणारी ही संघटना आहे. त्यामुळे आम्ही सर्व कलाकार एकत्र येऊन मनोरंजन सृष्टीतील फक्त कलाकार नाही तर जे संपूर्ण युनिट आहे त्यासाठी आम्ही काम करणार आहोत. आजच आम्ही या संघटनेचा शुभारंभ केला.

हार्दिक शेवटी लिहीतो.. "आता या चित्रपट संघटनेमार्फत आम्ही हळूहळू विविध योजनाही तयार करत जाऊ.

कलाकारांच्या आणि मनोरंजन सृष्टीतील ज्या समस्या आहेत त्या शासनापर्यंत पोहोचवण्याचा हा योग्य मार्ग आहे असं मला वाटलं आणि म्हणूनच यात सहभागी झालो.” असा खुलासा हार्दिकने केलाय.

काल गुरुपौर्णिमेच्या शुभमुहूर्तावर तुझ्यात जीव रंगला या मालिकेतील प्रसिद्ध अभिनेत्री अक्षया देवधर अर्थात पाठक बाई यांनी शिंदे गटात प्रवेश केला.

याशिवाय हार्दिक जोशी, अभिनेत्री अदिती सारंगधर, आणि माधव देवचके यांनीही मुख्यमंत्री एकनाथ शिंदेंच्या उपस्थितीत शिवसेनेत प्रवेश केला.

आता हार्दिक जोशीने सांगीतल्याप्रमाणे या संघटनेच्या माध्यमातुन मराठी कलाकार कोणत्या नवीन उपाययोजना राबवणार हे पाहणं कुतूहलाचा विषय आहे.