कंगना आणि वाद हे जणू समीकरणच झालं आहे. ट्विटरवर दररोज कंगना कोणा ना कोणावर निशाणा साधताना दिसते. आपली मतं बेधडकपणे मांडणाऱ्या कंगनाला अनेकदा ट्रोलिंगचा सामना करावा लागतो. कंगनाने नुकताच तिचा वाढदिवस साजरा केला. वाढदिवस आणि तिच्या आगामी चित्रपटाबद्दल आयोजित केलेल्या पत्रकार परिषदेत तिला याविषयी प्रश्न विचारला गेला. "तू सतत लोकांशी पंगा का घेतेस", असा प्रश्न एकाने तिला विचारला असता तिने त्यावर मोकळेपणाने उत्तर दिलं. कंगनाच्याच आगामी 'थलायवी' या चित्रपटातील संवादाचा मजेशीर वापर करत त्या पत्रकाराने तिला प्रश्न विचारला. यावरून कंगनासह उपस्थितांनाही हसू अनावर झालं. 

पत्रकाराच्या प्रश्नावर कंगनाचं उत्तर
"मी लोकांना जे काही बोलते किंवा जे काही मी करते, ते खूपच हलक्या मनाने बोलते आणि करते. पण लोक ते गंभीररित्या घेतात. कारण ती लोकं आयुष्यात तितकेच गंभीर आहेत. त्यामुळे एकानंतर एक गोष्टी घडत जातात आणि वाद वाढत जातो. मी लोकांवर टीका करत असले किंवा माझ्या मनातलं बोलत असले तरी त्यांच्याशी पुन्हा संवाद साधणं माझ्यासाठी खूप सोपं असतं. कारण माझ्या मनात काही कटू भावना नसतात. पण कदाचित लोकांना ते आवडत नाही आणि माझ्यावर जोरदार टीका होऊ लागते. यामुळे मीसुद्धा एक पाऊल मागे घेते. मला असं वाटतं की जर तुमचं मन साफ असेल तर तुम्ही नेहमीच जिंकता," असं कंगना म्हणाली. 

हेही वाचा : "त्याने मला हॉटेलच्या रुममध्ये बोलावलं आणि.."; अंकिताने सांगितला कास्टिंग काऊचचा धक्कादायक अनुभव

ट्विटर या सोशल मीडिया अकाऊंटवर कंगना बरीच सक्रिय असते. विविध मुद्द्यांवर ती ट्विटरवर व्यक्त होते. तिच्या स्पष्टवक्तेपणामुळे अनेकदा तिला ट्रोल केलं गेलं. मात्र या ट्रोलिंगला न जुमानता कंगना तिची मतं मांडताना पाहायला मिळते.