Women Asia Cup 2022: महिला आशिया कप स्पर्धेतील रंगत आता वाढली आहे. या स्पर्धेच्या दुसऱ्या सेमी फायनलमध्ये श्रीलंकन संघानं पाकिस्तानच्या संघाला पराभवाची धुळ चारली. त्यामुळे त्यांचा आत्मविश्वास कमालीचा वाढला आहे. आपण आता फायनला पोहचलो आहोत याचा आनंद श्रीलंकन टीमनं ज्याप्रकारे साजरा केला आहे त्याची सोशल मीडियावर जोरदार चर्चा आहे. त्याचा व्हिडिओ व्हायरल झाला असून त्यात श्रीलंकन महिला टीम नाचून आनंदोत्सव साजरा करताना दिसत आहे.

आता श्रीलंकेची फायनल 15 ऑक्टोबरला आहे. त्यांची लढत भारतीय संघाशी होणार आहे. त्यामुळे त्यांच्यासमोर तगडे आव्हान असणार आहे. एकीकडे सोशल मीडियावर फायनलमध्ये जाण्याचा आनंद श्रीलंकन टीम साजरा करत असली तरी दुसरीकडे भारतीय संघाशी त्यांची होणारी लढत आव्हानात्मक असल्याचे सांगण्यात येत आहे. त्या व्हिडिओवर नेटकऱ्यांनी दिलेल्या प्रतिक्रिया मोठ्या गंमतीशीर आहेत. त्यात एकानं लई नाचू का, फायनल भारतासोबत असल्याचे सांगून श्रीलंकन टीमला सावध केले आहे.

श्रीलंका महिला संघाची कॅप्टन चमारी अट्टापट्टूनं टॉस जिंकून पहिल्यांदा फलंदाजीचा निर्णय घेतला होता. श्रीलंकन टीमनं 122 धावांचे लक्ष्य पाकिस्तानसमोर ठेवले होते. मात्र पाकिस्ताननं हलक्यात घेऊन अतिआत्मविश्वासाच्या नादात हा सामना गमावल्याचे दिसुन आले. अवघ्या एका धावेनं श्रीलंकन टीमचा विजय झाला. त्यामुळे हा पराभव पाकिस्तानच्या चांगलाच जिव्हारी लागला आहे.