झी मराठी वाहिनीवरील अल्पावधीत लोकप्रिय झालेली 'येऊ कशी तशी मी नांदायला' Yeu Kashi Tashi Mi Nandayla ही मालिका सध्या सोशल मीडियावर चर्चेत आहे. या चर्चेमागचं कारण म्हणजे या मालिकेचा नवा प्रोमो. झी मराठीने त्यांच्या इन्स्टाग्राम अकाऊंटवर या मालिकेचा नवीन प्रोमो पोस्ट केला आहे. या प्रोमोमधील नलू मावशी अर्थात अभिनेत्री दिप्ती केतकर Dipti Ketkar यांच्या अभिनयावरून नेटकऱ्यांनी खिल्ली उडवली आहे. 'ओव्हर अ‍ॅक्टिंगचे ५० रुपये कापा', असे कमेंट्स नेटकऱ्यांनी या व्हिडीओवर केले आहेत. (yeu kashi tashi mi nandayla nalu mavshi aka dipti ketkar trolled for over acting)

या मालिकेत सध्या ओम आणि स्वीटूची लव्हस्टोरी दाखवण्यात येत आहे. स्वीटू आणि ओमच्या प्रेमाला स्वीटूच्या आईचा म्हणजेच नलिनीचा विरोध आहे. या नव्या प्रोमोमध्ये नलू मावशी स्वीटूवर राग व्यक्त करताना दिसते. ओमकार आणि स्वीटूचं बोलणं थांबवण्यासाठी ती चक्क स्वीटूचा फोन आगीत फेकून देते. याच दृश्यावरून नेटकऱ्यांनी तिला ट्रोल केलं आहे. 'आधीच भिकेचे डोहाळे आणि नाटक बघा, मोबाइल आगीत', अशी कमेंट एकाने केली. तर 'नलू मावशीचा कंगवा कोणी चुलीत टाकला होता का? त्याचाच सूड ती घेतेय', असं दुसऱ्याने लिहिलं.

'येऊ कशी तशी मी नांदायला' या मालिकेत अन्विता फलटणकर ही स्वीटूची तर शाल्व किंजवडेकर हा ओमकारची भूमिका साकारतोय. या दोघांशिवाय मालिकेत शुभांगी गोखले, अदिती सारंगधर, दिप्ती केतकर यांच्या महत्त्वपूर्ण भूमिका आहेत.