आदित्य सरपोतदार दिग्दर्शित 'झोंबिवली' हा चित्रपट येत्या २६ जानेवारी रोजी संपूर्ण महाराष्ट्रात प्रदर्शित होणार आहे. या चित्रपटाच्या निमित्ताने वैदेही परशुरामी (Vaidehi Parshurami), अमेय वाघ (Amey Wagh) आणि ललित प्रभाकर (Lalit Prabhakar) यांचं त्रिकुट आपल्याला पहिल्यांदाच मोठ्या पडद्यावर दिसणार आहे. या चित्रपटाचा ट्रेलर नुकताच प्रदर्शित झाला असून या चित्रपटाची भव्यता आणि झोंबीची पहिली झलक या ट्रेलरमधून दिसून येते. गेल्या दीड वर्षांपासून प्रेक्षक या चित्रपटाची वाट पाहत आहेत. चित्रपटाचा पहिला टिझर हा फेब्रुवारी २०२० मध्ये प्रदर्शित झाला होता. टीझर नंतर आलेल्या 'अंगात आलया' या गाण्याने अनेकांना आपल्या तालावर नाचवलं. (Zombivli trailer)

चित्रपटाच्या ट्रेलरमध्ये अमेय, वैदेही आणि ललित यांच्यासोबत तृप्ती खामकर, जानकी पाठक, राजेंद्र सिरसटकर हे ही कलाकार दिसत आहेत. जवळपास दोन मिनिटांच्या या ट्रेलरच्या सुरुवातीला अमेय आणि वैदेही हे पोलीस ठाण्यात झोंबींबद्दल बोलताना दिसत आहेत. डोंबिवलीत झोंबी आल्यानंतर तिथे काय परिस्थिती निर्माण होते, त्यावर मात करण्यात अमेय, वैदेही आणि ललित यांना यश मिळेल का हे प्रेक्षकांना चित्रपटात पहायला मिळेल. या ट्रेलरवर प्रेक्षकांचा सकारात्मक प्रतिसाद मिळत असून अनेकांनी सिनेमॅटोग्राफीचं कौतुक केलं आहे. मराठीत हा प्रयोग पहिल्यांदाच होत असल्याने प्रेक्षकांनाही त्याची फार उत्सुकता आहे.

दिग्दर्शक आदित्य सरपोतदारने याआधी फास्टर फेणे, माऊली, क्लासमेट्स यांसारखे दमदार चित्रपट दिले आहेत. त्यामुळे 'झोंबिवली'कडून आणखी अपेक्षा वाढल्या आहेत. आतापर्यंत गेम्समध्ये, हॉलिवूड चित्रपटांमध्ये पाहिलेले झोंबी आता मराठी चित्रपटातही पाहायला मिळणार आहेत. रोमँटिक, जॉली भूमिका केलेले मराठी चेहरे हॉरर भूमिकेत दिसणार आहेत.