ईट (जि.धाराशिव) , ता.२५ : ‘एकच मिशन मराठा आरक्षण’या आशयाची चिठ्ठी लिहून निपाणी (ता.भूम ) येथील युवा शेतकरी प्रवीण काकासाहेब घोडके ( वय ३६) याने शेतात साडीने गळफास घेत बुधवारी (ता.२५) दुपारी आत्महत्या केली. येथील प्राथमिक आरोग्य केंद्रात उत्तरीय तपासणीसाठी आणले असता त्याचा खिशात चिठ्ठी सापडली. त्यात ‘एकच मिशन मराठा आरक्षण’ असा उल्लेख करण्यात आला होता. याप्रकरणी पोलिस ठाण्यात घटनेची नोंद घेण्यात आली. त्याच्या पश्‍चात आजी , वडील,पत्नी, दोन मुली व मुलगा असा परिवार आहे.

घोडके याने आत्महत्या केल्याने मराठा आरक्षणाच्या मुद्दा ज्वलंत बनत असल्याचं दिसत आहे. गेल्या चार दिवसांत चार मराठा तरुणांनी आरक्षणाच्या मुद्द्यावरुन आत्महत्या केली आहे. मराठा आंदोलनाचे नेते मनोज जरांगे पाटील यांनी सरकारला दिलेला अल्टिमेटम बुधवारी संपला आहे. पण, सरकारकडून अद्याप कोणताही निर्णय घेण्यात आलेला नाहीत. त्यामुळे मराठा समाजामध्ये असंतोष निर्माण झाल्याचं सांगण्यात येत आहे.

मनोज जरांगे पाटील यांनी सरकारला ४० दिवसांचा वेळ दिला होता. पण, सरकारला मराठा आरक्षणावर तोडगा काढता आलेला नाही. जरांगे पाटील मराठा समाजाला कुणबी प्रमाणपत्र मिळावे या मागणीवर ठाम आहेत. या प्रकरणी स्थापन करण्यात आलेल्या निवृत्त न्यायमूर्ती संदिप शिंदे यांच्या अध्यक्षेतेखालील समितीने आणखी कालावधी मागितला आहे. त्यामुळे मराठा समाजाला आरक्षण कधी मिळणार असा सवाल विचारला जात आहे. (Latest Marathi News)