मराठा आरक्षणाच्या मागणीसाठी मराठा समाज आक्रमक झाला आहे. गेल्या काही दिवसांपुर्वी राज्यभरात मराठा समाजाने आंदोलने, रास्तारोको, साखळी आंदोलने केली. सरकारने मराठा समाजाशी चर्चा करत काही दिवसांचा वेळ घेतला आहे. दरम्यान मराठा समाजाला आरक्षण मिळावे या मागणीसाठी अनेकांनी टोकाचं पाऊल उचलतं आपलं जीवन संपवलं आहे. अशातच आणकी एका तरूणाने आरक्षणाच्या मागणीसाठी टोकाचं पाऊल उचलल्याचं समोर आलं आहे.

बीडमध्ये मराठा आरक्षणासाठी एका 22 वर्षीय ऑटोरिक्षा चालक तरुणाने गळफास घेऊन आपली जीवन यात्रा संपवल्याची घटना समोर आली आहे. ही घटना बीडच्या (Beed) धारूर तालुक्यात असणाऱ्या देवठाणा गावात घडली आहे. प्रवीण बाबुराव सोळंके (वय 22 रा. देवठाणा) असे आत्महत्या केलेल्या तरूणाचे नाव आहे.

मृत प्रवीणच्या खिशात एक चिठ्ठी सापडली आहे. त्यामध्ये "मी मराठा समाजाला आरक्षण मिळत नसल्याने आत्महत्या करत आहे" असा मजकूर लिहिलेला आहे. याप्रकरणी सिरसाळा पोलीस ठाण्यामध्ये आकस्मित मृत्यूची नोंद करण्यात आली असून पुढील तपास एपीआय दहिफळे करत आहेत.

दरम्यान, मराठा आरक्षणाचा मुद्दा चांगलाच तापला आहे. मराठा आंदोलक मनोज जरांगे पाटील (Manoj jarange Patil) राज्यभरात दौरे करत सभा घेत आहेत. या सभांमधून ते मराठा आरक्षणासाठी आक्रमकपणे भूमिका मांडत आहेत. तसेच जरांगे पाटलांनी सरकारला २४ डिसेंबरपर्यंतचा अल्टिमेटमही दिला आहे.