कन्नड, (जि. औरंगाबाद) : येथील माळीवाडा परिसरात राहणारे आप्पासाहेब श्‍यामराव गायकवाड (वय 50, मूळ रा. बोरसर, ता. कन्नड) यांचा गळा आवळून खून करण्यात आल्याची घटना गुरुवारी (ता. 29) सकाळी उघडकीस आली. आप्पासाहेब गायकवाड यांच्या चुलतभावाने दिलेल्या फिर्यादीवरून शकील शमीम शेख (रा. समर्थनगर, कन्नड) यांच्याविरोधात गुन्हा दाखल करण्यात आला आहे. 

आप्पासाहेब गायकवाड यांच्या भावाचे निधन झाल्याने ते कुटुंबीयांसह बोरसर येथे गेलेले होते. गॅस सिलिंडर आणण्यासाठी बुधवारी (ता. 28) ते गल्लेबोरगाव येथे गेले होते; मात्र त्यांच्यासोबत असलेल्यांना त्यांनी "मी कन्नड येथे जाऊन येतो' असे सांगितले होते. त्यांच्यासोबत गेलेली व्यक्‍ती गॅस घेऊन परत बोरसरला गेली, तर आप्पासाहेब कन्नडला आले. मात्र रात्री ते परत घरी न आल्याने तसेच मोबाईल बंद असल्याने त्यांचे चुलतबंधू संजय गायकवाड हे कन्नड येथील माळीवाडा येथे आप्पासाहेब राहत असलेल्या ठिकाणी पोचले असता त्यांना घरात आप्पासाहेब निपचित अवस्थेत पडलेले दिसले. एकजण बाहेरच्या खोलीत झोपलेले आढळले. संबंधित व्यक्तीची चौकशी केली असता त्याने त्याचे नाव शकील शेख (रा. समर्थनगर) असे असल्याचे सांगितले. दरम्यान, संजय गायकवाड यांनी आप्पासाहेब यांच्या पत्नीस ही बाब सांगितली असता या व्यक्तीकडे आप्पासाहेब यांचे सात-आठ लाख रुपये बाकी असल्याचे सांगितले. त्यामुळेच त्याने आप्पासाहेबांना मारले असावे, असा अंदाज असून, त्यानुसार संजय गायकवाड यांनी फिर्याद दिली आहे. 

याबाबत माहिती कळताच उपविभागीय पोलिस अधिकारी जगदीश सातव, शहर पोलिस ठाण्याचे निरीक्षक रामेश्वर रेंगे, सहायक पोलिस निरीक्षक बालाजी वैद्य, कैलास करवंदे यांच्यासह स्थानिक गुन्हे शाखेच्या पोलिसांनी घटनास्थळी जाऊन पाहणी केली. आप्पासाहेब गायकवाड यांना ग्रामीण रुग्णालयात दाखल केले असता वैद्यकीय अधिकाऱ्यांनी तपासून मृत घोषित केले. उत्तरीय तपासणी करून मृतदेह नातेवाइकांच्या ताब्यात देण्यात आला.