नांदेड : एका खून प्रकरणात बालगृहात शिक्षा भोगत असलेल्या एका अल्पवयीन बालिकेवर अत्याचार केल्याप्रकरणी शिवाजीनगर पोलिस ठाण्यात विविध कलमानुसार रविवारी (ता. एक) मार्च रोजी रात्री उशिरा गुन्हा दाखल करण्यात आला आहे.  

शहराच्या तेहरानगर येथील एका १५ वर्षीय अल्पवयीन मुलीसह तिच्या नातेवाईकावर शिवाजीनगर पोलीस ठाण्यात काही दिवसापूर्वी खूनाचा गुन्हा दाखल करण्यात आला होता. या प्रकरणात या मुलीला एका बालगृहात ठेवण्यात आले होते. दरम्यान याच भागातील रहिवासी असलेला अशरफखान परवेजखान याने सदर अल्पवयीन मुलीस चार महिन्यांपूर्वी स्वतः च्या घरी बोलावून तिच्यावर वारंवार अत्याचार केला. यामध्ये मुलगी गरोदर राहिली.

शिवाजीनगर ठाण्यात गुन्हा दाखल

याप्रकरणी पिडीत युवतीने दिलेल्या फिर्यादीवरून शिवाजीनगर पोलिसांनी आरोपीविरुद्ध अत्याचार, बालकांचे लैंगिक अपराधापासून सरंक्षण अधिनियमसह अनुसूचीत जाती- जमाती अंतर्गत गुन्हा दाखल केला. या प्रकरणाचा तपास उपविभागीय पोलीस अधिकारी (शहर) अभिजित फस्के करत आहेत.

हेही वाचा - अशोक चव्हाण म्हणाले, अभिव्यक्ती स्वातंत्र्यावर येत आहे गदा

डॉ. करुणा जमदाडे यांच्या 'ऊर्जा' ग्रंथाचे प्रकाशन

नांदेड : येथील लेखिका व सामाजिक कार्यकर्त्या डॉ. करुणा जमदाडे यांच्या 'ऊर्जा' या ग्रंथाचा प्रकाशन समारंभ रविवारी (ता. एक) मार्च रोजी सकाळी ११ वाजता कुसुम सभागृहात शंकर साहित्य दरबारच्या भव्य साहित्यसोहळ्यात संपन्न झाला.

नांदेडच्या इसाप प्रकाशनाने प्रकाशनासाठी सिद्ध केलेल्या या ग्रंथाचे प्रकाशन राज्याचे सार्वजनिक बांधकाम मंत्री अशोक चव्हाण यांच्या शुभहस्ते झाले.
याप्रसंगी ज्येष्ठ पत्रकार कुमार केतकर, प्रसिद्ध कवी आ. लहू कानडे, अखिल भारतीय मराठी साहित्य महामंडळाचे अध्यक्ष प्राचार्य कौतिकराव ठाले- पाटील कवयित्री अनुराधाताई पाटील, माजीमंत्री डी. पी. सावंत आदींची उपस्थिती होती.