जालना: ऍट्रोसिटीच्या गुन्ह्यात मदत करण्यासाठी दोन लाखांची लाच घेतल्या प्रकरणी पुणे लाच लुचपत प्रतिबंधक विभागाच्या पथकाने जालना उपविभागीय पोलिस अधीक्षक सुधीर खिरडकर याच्यासह दोन पोलिस कर्मचाऱ्यांना गुरूवारी (ता.२०) ताब्यात घेतले आहे. दरम्यान या प्रकरणी चौकशी सुरू आहे.

तक्रारदार यांच्यावर काही दिवसांपूर्वी तालुका जालना पोलिस ठाण्यात ॲट्रोसिटीचा गुन्हा दाखल झाला होता. या गुन्ह्याचा तपास उपविभागीय पोलिस अधीकारी सुधिर खिरडकर यांच्या होता. या गुन्ह्यात मदत करण्यासाठी तक्रारदार यांच्याकडे तब्बल पाच लाखांची लाच मागण्यात आली. याप्रकरणी तडजोतीअंती तीन लाख रूपये देण्याचे ठरले. मात्र, तक्रारदार यांनी या प्रकरणी पुणे लाच लुचपत प्रतिबंधात्मक विभागाकडे तक्रार केली. त्यानंतर पुणे येथून एक पथक जालना शहरात दाखल झाले.

या पथकाने दोन दिवस या तक्रारीची पडताळणी करून खात्री केली. त्यानंतर गुरूवारी (ता.२०) पुणे येथील लाच लुचपत प्रतिबंधक विभागाच्या पथकाने कदीम जालना पोलिस ठाण्याचा पोलिस कर्मचारी संतोष निरंजन अंभोरे याला पोलिस उपविभागीय कार्यालयाच्या आवारात दोन लाखांची लाच घेताना रंगेहाथ अटक केली. तसेच संशयित उपविभागीय पोलिस अधीकारी सुधिर अशोक खिरडकर, पोलिस कर्मचारी विठ्ठल पुंजाराम खार्डे यांना लाच लुचपत प्रतिबंधक विभागाने ताब्यात घेतले आहे. दरम्यान या प्रकरणी उपविभागीय पोलिस अधीकारी सुधीर खिरडकर याची चौकशी सुरू असून या प्रकरणी अद्यापि गुन्हा दाखल झालेला नाही.

ही कारवाई लाच लुचपत प्रतिबंधक विभागाच्या पुणे पथकातील पोलिस उपअधीक्षक वर्षांराणी पाटील, पोलिस निरीक्षक सुनील क्षीरसागर, कर्मचारी नवनाथ वाळके, किरण चिमटे, दिनेश माने यांनी केली.