अंबड,जि.जालना : अंबड-जालना महामार्गावरील मठपिंपळगाव फाट्यालगत असलेल्या मत्स्योदरी शाळेजवळ एका दुचाकीला अज्ञात वाहनाने जोराची धडक दिल्याने दुचाकीवरील एक जागीच ठार तर एकजण गंभीर जखमी झाला आहे. याबाबत सविस्तर माहिती अशी की, अंबड तालुक्यातील शेवगा येथील सोपान आसाराम बोंगाने व ज्ञानेश्वर कारभारी नागरे हे दोघे दुचाकी वरून जालनाकडून-शेवग्याकडे जात असताना मठपिंपळगाव फाट्यालगत असलेल्या मत्स्योदरी शाळेसमोर त्यांच्या दुचाकीला शनिवारी (ता.29) रात्री साडेसात वाजेच्या दरम्यान जोराची धडक दिली.

यामध्ये सोपान आसाराम बोंगाने (वय 35) वर्षे हा जागीच ठार झाला आहे. तर ज्ञानेश्वर कारभारी नागरे (वय 29) वर्षे हा अपघातात गंभीर जखमी झाला. त्याला ग्रामस्थांच्या मदतीने रुग्णवाहिकेतून जालना येथील जिल्हा रुग्णालयात उपचारासाठी हलविण्यात आले आहे. या अपघाताची घटना परिसरात वाऱ्यासारखी पसरली.

सोपान बोंगाने यांच्या अपघातातील निधनाने परिसरात हळहळ व्यक्त करण्यात येत आहे. या घटनेची माहिती मिळताच शेवगा, हारतखेडा, मठपिंपळगाव, गोलापांगरी, गोलासह परिसरातील ग्रामस्थ, व्यवसायिक घटनास्थळी मदतीसाठी धावले. सोपान बोंगाने यांच्या पश्चात पत्नी, एक मुलगा पाच वर्षाचा मुलगा, एक तीन वर्षाची मुलगी, आई असा परिवार आहे.

अंबड-जालना महामार्गावरील गोलापांगरी, मठपिंपळगाव, शेवगा, हारतखेडा, शेवगा, कर्जतफाटाश परिसरात सतत अपघाताचे प्रमाण वाढत चालले आहे. या महामार्गावर वाहन चालकांसाठी गतिरोधक, दिशादर्शक फलक नसल्याने भरधाव वेगाने धावणाऱ्या वाहनांमुळे अनेकांना प्राणाला मुकावे लागत आहे.