अंबड (जि.जालना) : अंबड-जालना महामार्गावरील (Ambad Jalna Highway) शेवगाफाट्यावर एका दुचाकीस्वाराला अज्ञात वाहनाने धडक (Accident) दिल्याने दुचाकी चालक जाग्यावर गतप्राण (Death) झाला आहे. याबाबत सविस्तर माहिती अशी की, घनसावंगी तालुक्यातील गुंज बु.येथील रहिवासी तथा अंकुशनगर येथील समर्थ सहकारी साखर कारखान्यातील अकाउंट विभागातील कर्मचारी गोवर्धन काशिनाथ काजळे (वय 43) यांचा अपघातात जागीच मृत्यु झाला आहे.

पारनेरपेट्रोल पंप येथुन विवाह समारंभ उरकुन ते अंबड कडुन जालना शहराकडे रविवारी (ता.26) दुपारी दोन वाजेच्या दरम्यान मुलाकडे जालण्याला जात असताना शेवगा फाटा येथे त्यांच्या दुचाकीला कोण्यातरी अज्ञात वाहनाने जोराची धडक दिली. त्यात ते जागेवर ठार झाले. या घटनेची माहिती मिळताच अंबड पोलिस ठाण्याचे पोलिस हेड कॉन्स्टेबल संतोष वनवे, फलटनकर, सतीश देशमुख, चव्हाणसह कर्मचारी घटनास्थळी दाखल झाले होते. त्यांनी घटनास्थळी पोलिस पंचनामा केला.

ग्रामस्थांच्या वतीने मृतदेह अंबड येथील उपजिल्हा रुग्णालयात शवविच्छेदन दाखल केला. रात्री उशिरा गुंज बु.त्यांच्या मूळगावी रात्री शोकाकुल वातावरणात अंत्यसंस्कार करण्यात आले. त्यांच्या पश्चात पत्नी, दोन मुले, आई, वडीलसह आदी मोठा परिवार आहे. अंबड पोलिस ठाण्यात रात्री उशिरा पर्यंत गुन्हा दाखल करण्याची प्रक्रिया सुरू होती.